شیخان میدیا
ڕێوڕەسمێن قۆڵکێشانێ ئێک ژ ڕێوڕەسمێن پیرۆزێن ئۆلا ئێزدیانە، کو ساڵانە ل ١٦ و ١٧ و ١٨ێ ئادارێ (ل دویڤ مەها ڕۆژهەڵاتی) ب ڕێڤە دچن. ئەڤ ڕێوڕەسمە سێ ڕۆژان دکێشن و ب ئامادەبوونا جڤاتا ڕۆحانی، بابەشێخ و شکەستی دهێنە ئەنجامدان.
🔵د ڤان سێ ڕۆژان دا قۆڵ (دارێن هشک) دهێنە ڤەگوهاستن؛ بۆ ماوێ دوو ڕۆژان ل دیوانا شێخادی و ڕۆژەکێ ژی ل دیوانا شێشەمس دمینن. مەرەم ژ کۆمکرن و ئینانا ڤان قۆڵان ئەوە کو ل دەمێ گڤاشتنا زەیتوونان، ئاڤێ پێ گەرم دکەن، هەروەسا بۆ وەرزێ زڤستانێ بۆ سوتنێ ژی دهێنە بکارئینان.
🔵ئێک ژ خالێن هەرە گرنگ یێن بکارئینانا ڤان قۆڵان، بۆ چێکرنا خوارنا سماتێ یە؛ ژبەرکو ئەڤە خوارنەکا تایبەت و پیرۆزە، پێدڤیە ئاگرێ وێ یێ سروشتی بیت. هەروەسا ئینانا قۆڵان وەک پاقژکرن و نویژەنکرنا سروشتی دهێتە هەژمارتن. تنێ ئەو دارێن شکەستی، هشک یان سۆتی دهێنە دەستنیشانکرن و نابیت چ دارێن دی بهێنە بڕین.
🔵ئەڤ کارە دڤێت د ناڤبەرا وان سێ ڕۆژێن دیارکری دا بیت، چونکی پشتی هینگێ بڕینا داران یا قەدەغەیە؛ ژبەر کو ل دەڤ ئێزدیان دار ژی وەک مرۆڤان خودان گیانن.