شێخان میدیا
د دەمەکێ پڕ د سەروەری دا کو گەلێ کوردستانێ ب شانازی ڤە پێشوازیێ ل (٨٠) سالییا دامەزراندنا پارتی دیموکراتی کوردستان و سالڕۆژا ژدایکبوونا سیمبولێ نەتەوەیی، جەنابێ سەروک مەسعود بارزانی دکەت، جارەکا دی سێبەرا خەمخوری و بابینییا بارزانی ل سەر ئاسمانێ دەڤەرێ زال دبیت. ب ڕاسپاردەیا ڕاستەوخۆ یا جەنابێ سەروک بارزانی و ب پشتەڤانییا مەیدانی و دلسۆزانەیا فەرماندەیێ خۆشتڤیێ دەڤەرا بەهدینان، جەنابێ (منصور بارزانی)، گەرا سێیێ یا پرۆسەیا هەڤژینییا ب کۆم ل قەزا شێخان بۆ (٦٠) بیک و زاڤایێن سنورێ لقا٢٠ دهێتە ئەنجامدان.
ئەڤ دەسپێشخەری یە کو بڕیارە ل ١٦ێ تەباخا ٢٠٢٦ێ ب ڕێڤە بچیت، وەک پەیامەکا بهێز یا مرۆڤایەتی و نیشتیمانی دهێتە دیتن، چونکی بێی چو جوداهییەکا سیاسی و بێ ئینتما، هەمبێزا خۆ بۆ کچ و کوڕێن (موسلمان، ئێزدی و کریستیان) ل سنورێ دەڤەرا شێخان ڤەکرییە، کو ئەڤە ژی ڕەنگڤەدانا ڕاستەقینەیا سیاسەتا حەکیمانەیا سەرکردایەتییا پارتی و ڕێبازا پیرۆزا بارزانی یە، کو هەردەم شێخان و دەڤەرا بەهدینان وەک نموونەیا بلند یا پێکڤەژیان و برایەتییا ئایینی پاراستییە.
د ڤێ چارچۆڤێ دا، ڕۆلێ جەنابێ سەروک بارزانی وەک بابەکێ خەمخور بۆ گەنجان دهێتە چەسپاندن، کو ب ڤان هەنگاڤان ئاسانکارییان بۆ ئاڤاکرنا خێزانێن نوی و سڤکرنا بارێ گران یێ ژیانێ ل سەر ملێن گەنجان دکەت. هەروەسا پشتەڤانییا بەردەوام یا فەرماندە منصور بارزانی، نیشانا وێ وەفاداریێ یە کو مالا بارزان هەر دەم د خەم و خۆشییێن خەلکێ دەڤەرێ دا هەڤپشک بووینە و ب کار و کریار سەلماندی ل بەرەیێ پێشیێ خزمەتکرنێ نە.
جهێ ئاماژێ یە کو ئەڤ کەرنەڤالە بتنێ ل شێخان نینە، بەلکو وەک زنجیرەکا ئاڤەدانکرن و خزمەتگوزاری ل هەر پێنج لقێن پارتی ل (دهۆک، ئیدارەیا سەربەخۆیا زاخۆ، شێخان، ئاکرێ و ئامیدیێ) ب هەمان شکۆ دهێتە ئەنجامدان، دا کو جەژن و بیرەوەرییا ١٦ێ تەباخێ ببیتە بنەمایێ پشکڤینا گولێن ژیانێ بۆ دەهان گەنجێن ڤێ دەڤەرێ. ئەڤە بەردەوامییا کاروانێ پڕ سەروەرییا قوتابخانەیا بارزانی یە، کو تا هەتایێ خزمەتکرنا مرۆڤی و پاراستنا پێکڤەژیانێ ب پیرۆزترین ئەرکێ خۆ دزانیت
دادپەروەری و شەفافیەت؛ بنەمایێ سەرەکی یێ لقا ٢٠
ئەوا ئەڤێ پڕۆسەیێ دکەتە جهێ باوەرییا گەنجان و خەلکێ دەڤەرێ، ئەو ڕێ و شوونێن ڕێک و پێکن یێن کو لقا ٢٠ یا پارتی د دوو سالێن دەربازبووی دا پەیڕەو کرین. ئەڤ پڕۆسەیە ل سەر بنەمایێ دادپەروەرییا جڤاکی هاتییە دارشتن:
• سیستەمێ تیروپشکێ (قرعە): بۆ دابینکرنا هەمی مافان ب یەکسانی، لقا ٢٠ پەنا برە بەر سیستەمێ تیروپشکێ یێ ئاشکرا، دا کو هەر گەنجەکێ ل سنورێ لقا٢٠ مافێ خۆ ب دەست ڤە بینیت بێ چو جوداهی.
• بێ جوداهییا ئینتما: د ڤێ کەرنەڤالێ دا، پیڤەرێ سەرەکی بتنێ خزمەتکرنا گەنجانە. گەنجێن (موسلمان، ئێزدی و کریستیان) ب هەمان چاڤ و ب هەمان شەفافیەت هاتینە هەلبژارتن، کو ئەڤە نیشانا دیموکراسییەت و حیکمەتا سەرکردایەتییا پارتی یە.
سەرکەفتنا بەردەوام د سێ گەران دا
سەرکەفتنا مەزن یا گەرا ئێکێ و دووێ، کو ب باشترین شێوە و ب ڕێ و ڕسمێن شایستە هاتبوونە ئەنجامدان، بوونە پالپشتەکا ب هێز بۆ هندێ کو لقا ٢٠ ب هەمان ڕێک و پێکی بەرەڤ گەرا سێیێ هەنگاڤان بهاڤێژیت. ئەڤ سەرکەفتنە بەرهەمێ وێ سیاسەتا حەکیمانە یە کو مالا بارزان پەیڕەو دکەت، کو تێدا گەنج وەک ستوینا سەرەکییا جڤاکی دهێنە دیتن و د هەمی بارودۆخان دا پشتەڤانییا وان دهێتە کرن.
ئەنجامدانا ڤێ شەهیانا ب کۆم ل قەزا شێخان، کو هەڤدەمە ل گەل یادێن پیرۆزێن پارتی و بارزانی، دوپاتکرنە ل سەر وێ یەکێ کو ڕێبازا بارزانی نە بتنێ ڕێبازەکا سیاسی یە، بەلکو قوتابخانەیەکا مرۆڤایەتی و خزمەتگوزارییە. ب چاڤدێرییا لقا ٢٠ و پشتەڤانییا فەرماندە منصور بارزانی، شێخان دێ مینیت سیمبوڵێ پێکڤەژیانێ و جهێ گەهشتنا گەنجان ب هیڤی و ئاواتێن وان.
پیرۆزباهییا هەمی بیک و زاڤایێن گەرا سێیێ دکەین و دەستخۆشیێ ل لقا ٢٠ و هەمی لژنێن سەرپەرشت دکەین بۆ وێ دادپەروەرییا د دابەشکرنا ڤێ دیاریا جەنابێ سەروک دا پەیڕەو دکەن