شاندێ حكومهتا هەرێما کوردستانێ و حکومەتا عیراقێ ل سەر 16 خالێن تایبەت ب سیستەمێ ئەسیکۆدا ڕێککەڤتن، ئەو ڕێککەڤتنه هاتیە ئیمزاکرن، د كۆمبوونا بهێت یا جڤاتا وەزارییا ئابوورییا عیراقێدا دێ ب فەرمی هێتە پەسندکرن.
ناڤهڕۆكا كۆمبوونا ههولێر و بهغدا ل دۆر ئهسیكۆدا؛
* ههرێما کوردستانێ دێ دهستههلاتا تەمام هەبیت بۆ تۆمارکرنا کۆمپانیێن هەرێمێ د سیستەمێ ئەسیکۆدا.
* ڕاهێنان ب کارمەندێن دەروازێن سنووری یێن هەرێما کوردستانێ ژ لایێ گومرکا فیدرالیڤە دێ هێتەکرن.
* ئەڤ ڕێککەڤتنە پشتبەستن ب بڕگەیێن ماددەیێن (110، 112، 114 و 121 بڕگەیێ سێ) ژ دەستوورێ عیراقێ هاتیە ئیمزاکرن.
* ئێکخستنا پێناسا گومرکی ل ههموو دەروازهیێن عیراق و هەرێما کوردستانێ دێ هێتەکرن، هەر گوهۆرینەکا بهێتەکرن دێ ب هەڤپشکی بیت.
* زمانێ کوردی دێ بۆ سیستەمێ ئەسیکۆدا هێتە زێدەکرن.
* کۆپیا پاراستی یا سیستەمی بۆ هەموو عیراقێ دێ ل فەرمانگەها تەکنەلۆجیایا پێزانینان (IT) یا هەرێما کوردستانێ بیت.
* دانپێدان ب دهڤهرێن گومرکی یێن ئازاد یێن هەر دوو حکومەتان دێ هێتە کرن.
* ههموو بەلگەنامەیێن دەستەیا وەبەرهێنانا هەرێما کوردستانێ یێن تایبەت ب پرۆژەیان د سیستەمێ ئەسیکۆدا دێ کار پێ هێتەکرن.
* ل دۆر بابهتێ دەروازەیێن نهفەرمی، دێ لیژنەیەکا هەڤپشك بۆ هێتە پێکئینان.
* چ سانسۆر و جوداهی ل سەر چ دەروازەیان ل عیراقێ ناهێتە سەپاندن، ب دەروازەیێن هەرێمێ ڤە ژی.
* بابەتی داهاتی گومرکی و باج دێ ل جڤاتا ئابوورییا عیراقێ هێتە ئێکلاکرن.
* ڕۆژژمێرەکا چاندنێ یا ئێکگرتی دێ هێتە پەیڕەوکرن پشتبەستن ب ڕێککەڤتنا هەردوو وەزارەتێن چاندنێ.
* لێخۆشبوونا گومرکی و پاراستنا بەرهەمێ ناڤخۆیی دێ ل جڤاتا ئابووری هێتە ئێکلاکرن.
* پشکنینا کۆنترۆلا جۆری یا کەرەستە و کالایێن هاوردەکری دێ ژ لایێ دەزگەهێن پەیوەندیدار یێن هەر دوو حکومەتانڤە کار پێ هێتە کرن.
* مۆلەتا فرێكرن و ئینانا کالایان یا کو ژ لایێ حکومەتا هەرێمێڤە هاتیە دەرکرن دێ کار پێ هێتە کرن.
* بەلگەنامەیێن کۆمپانییێن هەرێما کوردستانێ یێن کو ژ لایێ تۆمارا کۆمپانییێن هەرێمێڤە هاتینە دەرکرن دێ پەسندکری بن.
* ئەو بەلگەنامەیێن ژ لایێ ڕێڤەبەرییا گشتی یا گەشەپێدانا پیشەسازی یا هەرێمێڤە دهێنە دەرکرن دێ کار پێ هێتەکرن.