شێخان میدیا
ڕاگەهاندنەک ژ پەیڤدارێ پارتی دیموکراتی کوردستان ب مێژوویا ٢١ێ حوزەیرانا ٢٠٢٦ێ
هاوەڵاتیێن خۆشتڤی
ژبەر هەستکرنا مە ب بەرپرسیارەتیا نەتەوەیی و نیشتمانی، و د هەمان دەم دا بۆ ڕێگریکردنێ ژ چەواشەکاریێ و ئاشکراکرنا ڕاستیان بۆ مێژوویێ، مە ب باش دیت کو بەرسڤا پشکەک ژ ئاخافتن و چەواشەکاریێن پەیڤدارێ ئێکەتی نیشتمانی کوردستان بدەین، یێ کو ل دویڤ کۆمبوونا سەرکردایەتیا حزبا خۆ ل ڕێکەوتی ٢١ێ حوزەیرانا ٢٠٢٦ێ بۆ کەناڵێن ڕاگەهاندنێ ئاخەڤتی. مەبەستا مە ئەوە ڕاستیان بۆ گەلێ خۆڕاگر و تێکۆشەرێ کوردستانێ دیار بکەین.
دویڤ هەلبژارتنا خولا شەشێ یا پەرلەمانێ کوردستانێ، د دەمەکێ دا کو پارتییا مە سەرەدان و دانوستاندنێن خۆ چڕ کربوون بۆ کاراکرنا پەرلەمانی و پێکئینانا کابینەیا نوو، ئێکەتیێ دەست ب کوشتنا دەمی کر بۆ هەلنەبژارتنا دەستەیا سەرۆکاتیا پەرلەمانی و پێکنەئینانا کابینەیا دەهێ. چونکی د ناخێ خۆ دا باوەری ب پرۆسەیا دەنگدان و هەلبژارتنێ نینە، لەوما کەفتنە بهانە ئینانەڤە و ب ئاشکرا ژی دهاتە هەستکرن کو پشتەڤانی ل ڤی ڕەفتار و مەرامێ وان دهاتە کرن. سەرۆکێ ئێکەتیێ ئەڤ چەندە نەڤەشارت و ل بەرچاڤێن خەلکی ڕاگەهاند کو ئەو دگەل پێکئینانا دامەزراوەیێن شەرعی نینە.
دڤیا پەیڤدارێ ئێکەتیێ ئاماژە ب ژمارەیا دەنگ و کورسیێن خۆ و یێن پارتی کربا د هەردوو هەلبژارتنێن پەرلەمانێ کوردستانێ و ئەنجوومەنێ نوێنەرێن عێراقێ دا، وێ دەمێ دا دیار بیت کا ئەم وەک پارتی نوینەرایەتیا چەند ژ خەلکێ کوردستانێ دکەین و ئەو ژی نوینەرایەتیا چەند دکەن. شایستەبوونا هەلبژارتنێ ل سەر وێ شەرعیەتا خەلک ددەتێ دهێتە پێوانەکرن، نە ل سەر درووشم و نەڕاستیان. خەلکێ کوردستانێ متمانە دایەڤە پارتی چونکی ژێ پشتڕاست بوون کو دێ دەستکەفتێن وان پارێزیت.
ئێکەتی ب هەمی تێبینیان ڤە خودانێ (٢٣) کورسیێن پەرلەمانی یە. ل دەف خەلکێ کوردستانێ یا ڕوونە ڕووداوا کارەساتبار یا لالەزار و زیندانیکرنا کەسێ ئێکێ یێ لڤینا نەوەی نوێ لەبەر چی بوون. ئەڤ ڕووداوە و کۆمەکا ڕووداوێن دی یێن ب ڤی ڕەنگی نە ئەڤێن پەیڤدارێ ئێکەتیێ شانازیێ پێ دکەت و وەسا دزانیت کو خەلکێ کوردستانێ ئەڤ ڕووداوێن شەرمزارکەر ژبیرکرینە! کوردستانی گەلەک ژ هندێ هۆشیارتر و داناترن کو ب ڕێزکرنا چەند پەیڤ و ڕستێن تژی چەواشەکاری باوەریێ بکەن.
پارتی ب بەرپرسیارەتی ڤە بەرامبەر ڕێباز و خەباتا خۆ یا نەتەوەیی و نیشتمانی, و ژ ڕوانگەها خەمخۆریێ بۆ بەرژەوەندیێن هاوەڵاتیێن کوردستانێ و پاراستنا ماف و دەستکەفتان – ئەوێن ب خوین و خەباتا چەندین سالان بدەست هاتین – چاڤپۆشی ژ گەلەک هەلوێستێن بەرێ و یێن نوکە یێن ئێکەتیێ کریە. بەلێ پێدڤیە ئەڤێ ژی بۆ وان ڕاست بکەینەڤە کاتێ دبێژن ئێکەتی سازشێ ل سەر مافێن خەلکێ کوردستانێ ناکەت؛ ڕاستی ئەوە کو تەنێ ئێکەتی یە مافێ خەلک و دەنگدەرێن کوردستانێ پێشێلکری و بوویە کۆسپ ل بەردەم پرۆسەیا دیموکراسی و کاراکرنا پەرلەمانی. ئێکەتی تەنێ نوینەرایەتیا دەنگدەرێن خۆ دکەت، ئەو لایەنێ نوینەرایەتیا ڕاستەقینە و زۆرینەیا خەلکێ کوردستانێ دکەت ئەڤە پارتی دیموکراتی کوردستانە، ئەڤە ژی متمانە و بڕیارا خەلکی یە. لەوما پارتی چ جاران سازشێ ل سەر ماف و ویستێن کوردستانیان ناکەت و دێ مافێن وان پارێزیت.
ئێکەتی ل سەر زارێ پەیڤدارێ خۆ بەهسا باڵ باڵێنێ (باڵباڵێن) دکەت! باشە بلا ئێکەتی د بکارئینانا هندەک چەمکێن نەجهێ خۆ دا بچیتە د ناخێ خۆ دا و خۆ ڕاست کەتەڤە، چونکی بەرسڤنەدانا پارتی سنوورێ خۆ هەیە. سروشتێ پارتی وەسا یە کو ئێک ڕێبەر و ئێک بڕیار و ئێکگرتی یە، و دێ هەر وەسا ژی مینیت بەرامبەر ئالنگاری و پلانێن وان و یێن ل پشت وان ژی. هەر ژبەر هندێ ژی پارتی یا سەرکەفتی بووی و ئێکەتی ژی گەهشتیە ڤی بارودۆخێ نوکە، مێژوو ژی شاهدە ل سەر ڤی بابەتێ.
ئاخافتنا ڕاست یا پەیڤدارێ ئێکەتیێ ئەو بوو دەما دبێژیت: ”سیاسەتا خۆسەپاندنێ زیانێ دگەهینیتە هەرێما کوردستانێ“. ئەرێ هەر ئێکەتی یە دڤێت ب زۆرداری و بێی گوهدانە دەنگ و ڕایێ خەلکێ کوردستانێ، خۆ ل سەر ئەنجامێن هەلبژارتنان بسەپینیت و چ حسابەکێ بۆ دەنگ و ژمارەیا کورسیێن لایەنێن دی نەکەت.
ئەم د پارتی دیموکراتی کوردستان دا، هەمی کوردستان و کوردستانی ل دەف مە ئازیزن و مە دڤێت خزمەتا وان بکەین. ئەڤە ئێکەتی یە جوداخوازی دروستکری و ناهێلیت یاسا و ڕێنمایێن کارگێڕی (ئیداری) و دارایی و پرۆژەیێن حکومەتا هەرێمێ ل هەمی سنوورێ کوردستانێ بهێنە بجهئینان.
هیڤیدارین ئەڤان ڕەفتارێن خۆ بگۆهرن و ئێدی پشکەکا گرنگ و ئازیز ژ هەرێما مە نەکەنە بارمتە بۆ بجهئینانا مەرامێن خۆ، و ئێدی نەبنە ئەگەرێ نیگەرانیێ؛ و پێدڤیە ئێکپارچەییا هەرێمێ، قەوارەیێ وێ، ماف، دەستکەفت و ئارامیا خەلکێ کوردستانێ ل بەرچاڤ بگرن، و ئێدی نەیار و دژمنێن گەلێ مە دڵخۆش نەکەن.
مەحمود محەمەد پەیڤدارێ پارتی دیموکراتی کوردستان