ئیلۆن مەسک، ملیاردێرێ ئەمریکی مژدەیەکێ ددەتە جیهانێ کو د شەش بۆ 12 مەهێن بهێت دا ئێکەمین نەشتەرگەریا چاندنا چیپی بۆ ڤەگەراندنا بینایی تاقی دکەت.
مەسک ڕوون دکەت کو ئەڤ سیستەمە ب ڕێکا هنارتنا سیگناڵان ب شێوەیەکێ ڕاستەوخۆ بۆ توێژاڵێ بینایی یێ مێشکی، ڕێڕەوێ سروشتی یێ چاڤی و دەمارێ بینایی دەرباز دکەت و پێشبینی ژی دهێتە کرن کو د قۆناغێن دەستپێکێ یێن داهێنانێ دا، کەسێ نابینا ب کوالیتیەکا نزم بینایی بۆ ڤەگەریت و ب ڕوونی تشتان نەبینیت، لێ د پاشەڕۆژێ دا دێ ئەڤ چەندە باشتر لێ هێت.
ئەڤ داهێنانا نوی یا کۆمپانیا نیورالینک ب ناڤێ ”بڵایندسایت”ـە و ژ لایێ دەزگەهێ خوارن و دەرمانی ل ئەمریکا ناڤونیشانێ ”ئامیرێ پێشەنگ” پێ هاتیە دان. لێ هێشتا بۆ بکارئینانێ نەهاتیە پەسەندکرن.
ئەڤ داهێنانا نوی مژدەیەکا گرنگە بۆ کەسێن نابینا و ئیلۆن مەسک مژدەیا چارەسەریا هەمیشەیی پێ ددەت.
ئارمانجا کۆمپانیایێ چییە؟
داهێنەرێن کۆمپانیا نیورالینک یا ئیلۆن مەسکی بۆ چاندنا مێشکی، دخوازن ب ڕێکا چیپەکێ یان پارچەیەکا بچووک یا ئەلیکترۆنی کو ب ژیرییا دەستکرد هاتیە چالاککرن و بەرنامەڕێژکرن، شیانا لۆقەیێ (جوولەیێ) بدەنە کەسێن ئیفلیج بووی، زێدەباری ڤێ چەندێ کەسێن نابینا ژی مفای ژێ ببینن و ئەو ژی بهێنە چارەسەرکرن.
ئەو چیپێن بچووک دشێن ئاماژە و سیگناڵێن مێشکی چالاک بکەن و ب خێرایی ڤەگوهێزن بۆ بەشێن دی یێن لەشی، وەک پێ و دەستان، ب ڤێ چەندێ ژی مێشک دێ شیان هەبن ئەو بەشێ ئیفلیج بووی یان ژ کار کەفتی، بکەڤیتەڤە لۆقەیێ (جوولەیێ).