وەزارەتا ساخلەمییا هەرێما کوردستانێ تۆمارکرنا تووشبوویەکێ نوو یێ تووشبوون ب نەخۆشییا تایێ خوینبەربوونێ ل باژێرێ دهۆکێ راگەهاند.
وەزارەتا ساخلەمیێ د راگەهاندنەکێ دا ئاماژە ب وێ یەکێ کریە، تووشبووی گەنجەکێ ٢٣ سالی یە، ئاکنجیێ گوندێ “بازێ” یە ل ئیدارا سەربەخۆ یا سۆران. ژ بەر بەرکەفتنا وی دگەل ئاژەلێن تووشبوو، نیشانێن نەخۆشیێ ل دەف وی دەرکەفتینە و پشتی سەرەدانا نەخۆشخانێ ل دهۆکێ و ئەنجامدانا پشکنینان، دیار بوویە کو هەلگرێ ڤایرۆسی یە.
دەربارەی رەوشا ساخلەمییا وی گەنجی، وەزارەتا ساخلەمیێ دبێژیت: “د نوکە دا ل بن چاڤدێرییا هویر یا پزیشکی دایە و چارەسەریێ وەردگریت، رەوشا وی یا ساخلەمی ژی هەتا نوکە یا جێگیرە.”
د پشکەکا دی یا راگەهاندنێ دا، وەزارەتا ساخلەمیێ داخوازێ ژ هاولاتییان دکەت پێگیر بن ب رێنماییێن ساخلەمیێ و دبێژیت: “پێدڤی یە د دەمێ هەبوونا هەر نیشانەکا گۆماناوی ل دەف ئاژەلان، تیمێن ڤێتێرنەری بهێنە ئاگەهدارکرن. هەروەسا ئەو کەسێن سەرەدەریێ دگەل ئاژەلان یان بەرهەمێن ئاژەلی دکەن، د دەمێ دەرکەفتنا هەر نیشانەکا نەساخلەم، بێی گیرۆبوون سەرەدانا نەخۆشخانەیان بکەن.”
دەربارەی ئامارا گشتی یا تووشبوویان ب ڤێ نەخۆشیێ د ئەڤ سالە دا، وەزارەتێ روون کریە کو پشتی پشکنین بۆ چەندین حالەتێن گۆماناوی هاتینە کرن، هەتا نوکە تنێ سێ تووشبوویێن تایێ خوینبەربوونێ د ناڤ هەرێما کوردستانێ دا هاتینە پشتراستکرن. ژبلی وێ ژی دوو تووشبوویێن دی کو ئاکنجیێن پارێزگەهێن دی یێن عێراقێ بوون، بۆ چارەسەریێ هاتینە ڤەگوهاستن بۆ نەخۆشخانەیێن هەرێما کوردستانێ.