ڤەکۆلینەکا ئەمریکی ئاشکرا کریە کو تۆڕا جڤاکی یا تیکتۆک کاریگەریەکا ڕاستەوخۆ ل سەر حەزا خوارنا هەرزەکاران هەیە.
ل دویڤ ڤێ ڤەکۆلینێ، کو د گۆڤارا زانستییا “Journal of Nutrition Education and Behavior” دا هاتیە بەلاڤکرن، دیتنا ڤیدیۆیان ل ڤێ تۆڕێ هەرزەکاران هان ددەت و حەزا وان بۆ تاقیکرنا جۆرێن نوی یێن خوارنێ دجوڵینیت.
ئەدرینا بێل، ڤەکۆلەرا زانکۆیا مینیسۆتا، دەربارەی ڤێ دیاردەیێ ڕاگەهاند: هەرزەکار تیکتۆک وەک ژینگەهەکا سەرنجڕاکێش دبینن، ژبەر کو ڤیدیۆیێن تایبەت ب خوارنێ ب خێرایی سەرنجا وان ڕادکێشن و وان هان ددەن کو خوارنێن نوی تاقی بکەن.
ڤەکۆلینەکە ل سەر کۆمەکەک ژ بەشداربوویێن هەرزەکار، د تەمەنا 15 تا 16 سالی دا، ل ئێک ژ قوتابخانەیێن ئامادەیی یێن دەڤەرا ڕۆژئاڤای ناڤەڕاستا ئەمریکا هاتیە ئەنجامدان. بەشداربوویێن ڤەکۆلینێ ئاشکرا کر کو ئەوان ڕۆژانە ژمارەکا زۆر ژ ڤیدیۆیێن تایبەت ب هەلسەنگاندنا چێشتخانان، ڕێکێن ئامادەکرنا خوارنێ، ڕاوێژ و ڕێکلامێن ژەمان دبینن. وان جەخت کر کو ئەڤ ڤیدیۆیە حەزا وان بۆ هندەک جۆرێن خوارنێ دجوڵینیت.
دەربارەی کاریگەرییا کەسایەتیێن کاریگەر ل ئینتەرنێتێ، هندەک هەرزەکار ئاماژە ب وێ چەندێ کر کو دبیت حەز بکەن خوارنەکێ تاقی بکەن، ئەگەر ئەو کەسێ ژ ئینتەرنێتێ ڕێکلاما وی خوارنێ بکەت، ڕووخسارەکێ گونجای هەبیت.
د وەڵاما ڤان ڕاپۆرتان دا، ڤەکۆلینێ پێشنیار دکەت کو دایک و باب هەرزەکاران ژ مەترسیێن ڤێ ئەپلیکەیشنێ بپارێزن؛ ئەڤە ژی ب ڕێکا چاڤدێریکرنا ئەو ناڤەڕۆکان کو زارۆکێن وان دبینن و هەلسەنگاندنا کاریگەرییا وان بابەتان ل سەر ڕەفتارا وان دهێتە کرن.