ئێزدی کوردن، شنگال کوردستانە، و دیرۆک خوفروشا ژبیر ناکەت مەهدی حەسەن مراد شێخان میدیا ئێزدی کوردن، شنگال کوردستانە، و دیرۆک خوفروشا ژبیر ناکەت مەهدی حەسەن مراد پێشەکی: بابەتەک نە بۆ کینێ، بۆ بیرهاتنێ ئەم ل ڤێرێ باسێ ئێزدیا ناکەین وەکی ژمارەکا دەنگا ل پەرلەمانی، یان وەکی کارتەکا سیاسی ل بەغدا. ئەم باسێ ناسنامە، ئاخ، ئول و دیرۆکەکا ٧٤ فەرمانان دکەین. ئەڤە ماوەکە هندەک کەس ب ناڤێ ئێزدیا و شنگالێ دەرکەفتینە سەر شاشەیێن تەلەڤیزیونێ و تورێن کۆمەلایەتی و تیک توکێ. ئەو خو ددەن دیارکرن وەکی ڕیبەر و مەرجەع، لێ د ڕاستی دا ئەو نە ڕیبەرن، نە پارێزەرن. ئەو بازرگانێن ب خوین و ب ناڤێ قوربانینە. بێ شەرم و بێ عەیب دبێژن، ئەم دگەل عەرەباین ئەوێن تێشکێن داعش و نە کوردستانین، و دژاتیا کورد و کوردستانێ دکەن. ئەڤە ڕایەکی سیاسی نینە. ئەڤە خوفروشیە. ١. کێ بەرەڤانی ژ شنگالێ کر و کێ قوربانی دا ؟ ئەڤ کەسە ژ بۆ مانا خو ل پەرلەمانێ ئێراقێ، ژ بۆ کۆمکرنا چەند دەنگەکا، ژ بۆ ترسا ژ تیک توکچیا و رازی کرنا ئەفسەرێن لەشکەرێ ئیراقێ و حەشدا شعبی، هەر تشتەکی دبێژن. ئەو خو د زەحیفن، نە مێرخاسن، نە شورەشڤانن، نە پێشمەرگەهن، نە زێرەڤانن نە چەک هلگرێن پاراستنا شنگالن . هەگەر پارێزەر و شەڕڤان بان، وەکی حەیدەر شەشو و قاسم شەشو و قاسم دربو و ب سەدان مێرخاسێن شنگالی بان، ێەو نە دێ ژ دەنگدانێ ترسیان، نە ژ تیک توکێ. وان دێ ڕاستیا دیرۆکێ بێ ترس گۆتبا. لێ ئەڤە ئەو نینن. ئەڤە ئەوێن خو ب مووچەکی و پۆستەکێ و وێنەکێ دگەل بەرپرسەکێ حەشدێ فروتینە. ٢. ئێزدی کینە؟ ناسنامە، زمان، ئول و ئاخ ئێزدی بەشەکێ ڕەسەن و بنەڕەتی یێ گەلێ کوردن. نە ژ ئێراقێ هاتینە، نە ژ عەرەبا، نە ژ دەریا هاتینە. دیرۆکا وان دیرۆکا کوردستانێ یە. زمان: زمانێ ئێزدیا کوردیە، کورمانجیە. دایک و باب و کال و باپیرێن وان ب کوردی ئاخڤتینە. ستران، دوعا، قەسیدە و چیرۆکێن وان ب کوردینە. ئول: ئولا ئێزدیاتیێ ئولا کوردانە، ئولا ڕەسەنە. لالشا نورانی نە ل بەغدایە، نە ل نەجەفێ یە، نە ل کەربەلایە. لالش د دلێ کوردستانێ دایە، ل دەڤەرا شێخانێ یە، ل سەر ئاخا کوردستانێ یە. ئەو بنەکوک و کولیەکەیا کوردستانێ یە. ئاخ: شنگال چیایێ کوردستانێ یە. شنگال نە عەرەبستانیە، نە دەشتا عەرەبانە. شنگال ب چیایێ خو، ب گوندێن خو، ب لالشا خو ڤە کوردستانیە. ئەوانێن شک و گومان ل کوردستانیبون و کوردبونا ئێزدیا و شنگالێ هەیی، بلا شرمێ ژ دیرۆکێ بکەن، ژ زمانێ خو، ژ ئولا خو، ژ ئاخا خو. ٣. شنگال و ٧٤ فەرمان: بیرهاتنا کوشتارێ شنگالێ ٧٤ فەرمان دیتینە. ٧٤ جار کوشتار و تالان و بەرەڤکرن و کۆچبەرکرن. هەر جار ب دەستێ داگیرکەر و نەیاران هاتیە، لێ چ جار ئێزدیان دەست ژ کوردستانیبونا خو بەردا نە. د فەرمانا ٧٤ێ دا، ل ٢٠١٤ێ، کوردستانێ و گەلێ کورد خو ل شنگالێ و ئێزدیان کرە خودان. دەرگەهێ مزگەفتان ڤەکرن و بەتەنیێن سەر زاڕۆکێن خو دانە زارۆکێن ئێزدیان. کورێن خو شەهید کرن ژ بۆ شنگالێ. ئەڤە دیرۆکە، نە پروپاگەندە یە. ئەوێن ئەڤرۆ دبێژن ئەم دگەل عەرەباین، ئەو هەمان ئەون کو ئەڤرۆ دژی هەبونا ئێزدیاتی پیلانا دادڕێژن ژ بۆ پاشەڕۆژەکا وەندا. ٤. حەشد و ٤٠ گروپێن چەکدار هێشتا ٤٠ گروپێن چەکدار ل ئێراقێ هەنە. نە یەک، نە دوو، ٤٠. هەمی ب ناڤێن جودا، لێ ب ئارمانجەکا ئێک: داگیرکرنا شنگالێ و بێدەنگکرنا ئێزدیا و کوردا. حەشدا شەعبی و گروپێن ب سەر ڤە، شنگال کرینە قادا خو یا لەشکەری. نە ژ بۆ پاراستنا ئێزدیا، ژ بۆ کۆنترولکرنا ئێزدیا. ئەو دخوازن شنگال ژ کوردستانێ ببڕن و بکەنە پارچەکا ئێراقا عەرەبی. هندەک ئێزدیێن خوفروش بونە کرێگرتیێن ڤان گروپا. ب مووچەکی، ب پۆستەکێ، ب پاراستنا خو، خو فروتینە. نە ژ بۆ خەلکی، ژ بۆ خو. ٥. یەبەشە و هەڤپەیمانیا ئێزدیان: رادەستبون ل سەر بانگەوازیا ئیمرالی و قەندیلێ سەرانیێن یەبەشە و بەرپرسێن هەڤپەیمانیا ئێزدیان خو رادەستێ عەرەبا کرین ل سەر بانگەوازیا ئیمرالی و قەندیلێ. ئەڤە چەند سالە وان ب ناڤێ ئێزدیاتیێ، ئێزدیا ژ کوردستانێ دوردخن و بەرەڤ عەرەبا دبەن. وان شنگال کرە جهێ ململانێیا حیزبی و ئایدیولوژی. وان خەلکێ شنگالێ کرە قوربانیێن سیاسەتا قەندیل و ئیمرالیێ. ئەڤ بەرپرسە دبێژن ئەم نە کوردین، ئەم ئێزدینە. بێ شەرم ئەڤە دبێژن ل دەمێ لالشا نورانی هەمی دیرۆکا خو ب کوردی گۆتیە. ئەڤە دبێژن ل دەمێ زارۆکێن شنگالێ ب کوردی دگریان و دایکێن وان ب کوردی شین دکر. ئەڤە نە خەباتە، ئەڤە خوفروشیە. ٦. پەرلەمان، دەنگ و تیک توک هندەک ژ وان یێن بونە پەرلەمانتار ل بەغدا. ژ بۆ مانا خو ل وێرێ، ژ بۆ ترسا ژ دەنگ وەنداکرنێ، ژ بۆ ترسا ژ تیک توکچیا، هەر تشتەکی دبێژن. ئەڤرۆ دبێژن ئەم عەرەبین، سبە دبێژن ئەم نە کوردین، دوسبە دبێژن ئەم دگەل حەشدینە. ئەڤە پەرلەمانتاری نینە، ئەڤە بازرگانیا ب دەنگێ قوربانینە. دەنگێ ئێزدیێن شنگالێ، دەنگێ وان ژنێن هێشتا د دەستێ داعشێ دانە، دەنگێ وان کچێن هێشتا نەڤەگەراینە، وان کرینە بازار. ئەو د ترسن ژ ڕاستیێ، ژ بەر کو ڕاستی دێ وان ڕسوا کەت. ڕاستی ئەوە: ئێزدی کوردن، شنگال کوردستانە. ٧. ئەنجام: دیرۆک ژبیر ناکەت ئەڤ بابەتە نە ژ بۆ کین و ڕقێ یە. ژ بۆ بیرهاتنێ یە. ئەوێن شک و گومان ل کوردستانیبونا ئێزدیا هەیی، بلا بچنە لالشێ. بلا ل گۆرێن شەهیدێن شنگالێ بنێڕن. بلا ل چاڤێن دایکێن شنگالێ بنێڕن کو هێشتا ل کچ و کورێن خو دگەرن. ئێزدیاتی بێ کوردستانێ نابە. شنگال بێ کوردستانێ نابە. لالش بێ کوردستانێ نابە. ئەڤ خوفروشە دێ د دیرۆکێ دا وەکی خوفروش بنڤیسن. دیرۆک وان ژبیر ناکەت.