شێخان میدیا
ب ناڤێ خودایێ بەخشندە و میهرەبان
وەکی هەموو لایەک ئاگەهدار بن، ل گورەی ڕێککەفتنا د ناڤبەرا هێزێن هەڤپەيمان و حکوومەتا عێراقا فیدڕاڵدا، ئەڤڕۆ 30ێ ئەیلولا 2026 دووماهی ڕۆژە بۆ بدوماهیک هاتنا ئەركێ هێزێن هەڤپەيمان ل عێراق و هەرێما کوردستانێ. هەڤپەيمان د شەڕێ ل دژی تیرۆرێ دا و هەروەسا د ڤەگەراندن و ب‌هێزکرنا ئارامیێ ل عێراقێ دا پشتەڤانیا هێزێن عێراقێ و هێزێن پێشمەرگەی کرین.
هێزێن هەڤپەيمان د دەما ماینا خۆ دا هاریکارییەكا مەزن یا هێزێن عێراقێ و هێزێن پێشمەرگەی کرین و هەتا قوربانییێن مەزن ژی دان. نها ژی پشتی بدوماهیک هاتنا ئەركێ وان، ئەڤە د پاشەڕۆژێ دا بۆ حکوومەتا عێراقێ و هەرێما کوردستانێ بمینە کو ل گورەی رەوش و مەرجان و ژ بۆ پاراستنا ئارامیێ، ڕێککەفتنێن دوقۆڵی دگەل وەڵاتێن هەڤپەيمان بکەن.
ل ڤێرێ جهێ خۆیە کو ئەم سوپاسیا هەوڵ و ماندووبوونا هێزێن هەڤپەيمان بکەین، رۆلا وان د تێکشکاندنا داعشێ و ڤەگەراندنا ئارامیێ بۆ عێراقێ جهێ پێزانین و ڕێزگرتنەکە مەزنە. هەروەسا سلاڤ بۆ گیانێ پاک یێ هەموو شەهیدێن پێشمەرگە، هێزێن عێراقی و هێزێن هەڤپەيمان دەنێرین و یادا وان هەردەم بەرز بمینە.
دبارەی هەرێما کوردستانێ ژی ڤە گەلەک کەس ژ ڕوویێ پەرۆشیێ و هندەک ژی ژ ڕوویێ ڕق و شرۆڤەکرنا نادروست ڤە وای بۆ دچن کو ب نەمانا هێزێن هەڤپەيمان ئیدی هەرێم ژی دکەڤە ژێر هەڕەشە و بدوماهیک دهێت. دڤێت خەلکێ خۆشتڤى یێ کوردستانێ ژ وێ یەکێ دلنیا بکەم کو هەماهەنگییەكا گەلەک باش دگەل حکوومەتا عێراقا فیدڕاڵدا هەیە بۆ بەرپەرچدانەکا هەر جۆرە هەڕەشە و مەترسییەکێ، چ ئەو هەڕەشە د ژێر ناڤێ داعشێ دا بیت یان هەر ناڤەکێ تر.
هەر کەسەک و لایەنەک ژی خەیالا وێ یەکێ هەبیت ببە هەڕەشە و زیانێ بگەهینە ئاراما هەرێما کوردستانێ، با بزانن ل کوردستانێ پێشمەرگەیێن و قەهرەمان و گیانپارێزێن وەڵاتی هەنە کو بەرەڤانیێ ژ خەلک و خاکا کوردستانێ بکەن و هەموو هەڕەشە و دەستدرێژییان تێکبشکێنن. هێزا پێشمەرگەیێن کوردستانێ ژی کو ڕەگێ وێ د مێژووا خەباتا ڕزگاریخوازییا کوردستانێ دا هەیە و زادا خوێنا شەهیدان و فرمێسکێن دایکێن شەهیدانە، هەر بمینە. هێزا پێشمەرگەیێن کوردستانێ ب هەماهەنگییەكا تەواو دگەل هێزێن عێرافا فیدڕاڵدا، ئامادەن بۆ بەرەڤانی، پاراستنا ئاراما وەڵاتی و نەهێشتنا هەموو جۆرە هەڕەشە و مەترسییەکێ.
مەسعوود بارزانی
30ێ ئەیلوولا 2026