سەروەرییا نیشتمانی د ناڤبەرا گۆرنکاریێن جیهانێ و ئیرادەیا پێشمەرگەی دا
د قۆناغێن هەستیار و دیارکەرێن مێژوویا گەلان دا ل دەمەکێ کو نەخشەیێن سیاسی و سەربازی یێن دەڤەرێ دگەل ڤەکێشانا هێزێن هەڤپەیمانان بەرەڤ وەرچەرخانەکا نوی دچن و گەلێ کورد زێدەتر ژ هەر دەمەکێ ب باوەری و ئیرادەیەکا بلند بەرێ خۆ ددەتە پاشەرۆژا خۆ ئەڤ پێشهاتە و گۆرانکاری یە جهێ ترسێ نینە چونکی بنەمایێ پاراستنا ڤی ولاتی ل سەر باوەرییا رەوا و زێرەڤانێن راستەقینە یێن ئاخێ هاتییە ئاڤاکرن
ئەو پەیاما روون و وێرەک یا جەنابێ (سەرۆک بارزانی) راگەهاندی راستییا ستراتیجیا بەرگرییا كوردستانێ ب بیر و هۆشا هەمی لایەنەکێ دئینیت هەر ئیرادەیەک یان لایەنەک ب خەیالێن نەشرین بڤێت زەرەر و زیانێ ب قەوارا هەرێمێ و گەلێ وێ بگەهینیت دڤێت باش بزانیت کو قەلایەکا خوراگر یا پاراستنا گەل و ئاخا کوردستانێ ئامادەیە
د ڤێ قۆناغا هەستیار دا پێشمەرگە وەک ئەمانەتگەرێ هەمی دەستکەفتێن مێژوویی ئەڤرۆ ژی ژ هەمی دەمان پتر هێزا سەرەکی یا سەروەرییا نیشتمانی یە، سیاسەتا دانوستاندن و وژدانا هەمی هەلویستێن سەربازی و سیاسی ل سەر وێ ئیرادەیێ راوەستییایە کو ئاسایش و سەقامگیرییا كوردستانێ هێلا سوورە و ب چ رەنگان رێ ب چ پیلانان ناهێتە دان.
ل دەمەکێ کو جیهان و دەڤەر بەرەڤ هەڤسەنگیێن نوی پێنگاڤان دهاڤێژن و ورە و ئامادەییا پێشمەرگەی د سەنگەران دا یاسا و سەروەرییا راستەقینە دیاردەکەت. ئەڤ هێزا روحی و سەربازی د سەنگەران دا پەیامەکا ئاشکرا ددەتە دۆست و دوژمنان کو پاراستنا ئاخا کوردستانێ ئەركەکێ پیرۆزە و چ هێز یان گۆرانکاریێن سیاسی ناچێبیت ڤێ ئیرادەیێ بهەژێنن.
بووچونا هشیار و نیشتمانی یا بەرگریێ، رێكێ نادەت چ خەیالێن گۆرینا هەڤکێشەیا بەرەڤ تێکدانا سەقامگیریێ بڕێڤە بچن، سەروەرییا كوردستانێ ب خوین و مێژوویا قارەمانان هاتییە پاراستن و د داهاتی ژی دا پێشمەرگە دێ د ئامادەییا تەمام دا بیت بۆ تێکدانا هەر پیلانەکێ دژی کەرامەت و ئاخا کوردستانێ.
د ڤێ قۆناغێ دا، پەیاما جەنابێ (سەرۆک بارزانی) بۆ خەلکێ سەربەرزێ کوردستانێ پەیاما دلنیایی و پشتگەرمییەکا تمامە، مللەتێ مە ل ژێر سێبەرا هۆشیارییا سیاسی و ب وژدان و وێرەکییا سەنگەرێن هێزێن بەرگریێ، دشێت ب تەمامی پشتراست بیت کو ئارامی و کەرامەت و ئاسایشا مال و زارۆکێن ڤێ ئاخێ د دەستێن ئەمین و ب هێز دانە، چ گۆرانکاریێن سیاسی و سەربازی ل دەڤەرێ چێببن باوەری و خۆراگریا خەلکی دگەل هەبوونا پێشمەرگەی دێ وەکو چەپەرەکێ بنەرەتی مینیت بۆ ژناڤبرنا هەمی جۆرێن مەترسییان و پاراستنا سەقامگیرییا کوردستانێ د ناڤ هەر رەشەبایەکێ دا
