وەزارەتا دارایی یا هەرێما کوردستانێ دبێژیت، دووماهیا ڤێ سالێ دووماهی مۆلەتە بۆ ڤەکرنا هەژمارا بانکی بۆ هەمی فەرمانبەران.
ڕۆژا یەکشەمبی، وەزارەتا دارایی یا هەرێما کوردستانێ د ڕاگەهاندنەکێ دا ڕاگەهاند، “دابەشکرنا مووچەی ب کاش نامینیت، ل چ وەڵاتەکی دوو جۆر شێوازێن دابەشکرنا مووچەی نینن”.
ل گۆری ڕاگەهاندنێ، “ل دووماهیا سەرێ سالێ مووچە تەنها ب ڕێیا پرۆژێ (هەژمارا من) ڤە دهێتە خەرجکرن”.
دەقێ ڕاگەهاندنێ:
ڕاگەهاندنەک ژ ڕێڤەبەریا گشتی یا ژمێرکاری / وەزارەتا دارایی و ئابووری
دەربارەی پرسا ب بانکیکرنا مووچەیێ فەرمانبەران و مووچەخۆرێن هەرێما کوردستانێ د چوارچۆڤێ پرۆژێ هەژمارا من دا کو ماوێ دوو سالایە دەست پێ کریە و د قۆناغا دووماهیێ دایە، پشتی بەلاڤکرنا ئاگەهداریا ڕێڤەبەریا خانەنشینی یا سەر ب وەزارەتا مە ڤە د هەفتییا بۆری دا ل ڤێرێ و ل وێرێ خواندنێن نەدروست و نەبەرپرسیارانە بۆ هاتینە کرن، ب پێدڤی زانی ڤان ڕاستیێن ل خوارێ بێژین.
١- د ئەنجاما ڕێککەفتنا سەرێ مەها شوباتا ئەڤ سالە د ناڤبەرا شاندێ هەرێما کوردستانێ کو پێکهاتبوون ژ بەڕێزان ئاوات شێخ جەناب وەزیرێ دارایی و ئابووری و دکتۆر ئومێد سەباح سەرۆکێ دیوانا ئەنجومەنێ وەزیران و دکتۆر ئامانج ڕەحیم سکرتێرێ ئەنجومەنێ وەزیران و دکتۆر عەبدولحەکیم خەسرۆ سەرۆکێ فەرمانگەها هەماهەنگی و ب دووڤچوون و ژمارەیەک بەرپرس و ڕاوێژکار و ڕێڤەبەرێ گشتی دگەل شاندێ حکومەتا فیدرال ب سەرۆکاتیا بەڕێز دکتۆر فواد حسێن جێگرێ سەرۆک وەزیران و سەرۆکێ ئەنجومەنێ ئابووری یێ عیراقێ و خاتوو تەیف سامی وەزیرا دارایی یا عیراقێ، وەزارەتا دارایی یا عیراقێ دووماهیا سالا ٢٠٢٥ێ دیار کر بۆ وێ چەندێ کو هەمی فەرمانبەر و مووچەخۆرێن هەرێما کوردستانێ ببنە خودان هەژمارا بانکی یا تایبەت ب خۆ، ب پێچەوانەڤە د سالا نوو دا مووچە بۆ وان ناهێتە خەرجکرن.
٢- هەڤدەم ب پێی بریارا ژمارە (٥٥٠) یا ئەنجومەنێ وەزیرێن عیراقێ خالا سێیێ یا بڕگەیا سێیێ کو ل ڕۆژا (١٧ێ تەمموزا ٢٠٢٥) دەرچوویە و تێدا لژنا هەڤبەش یا پێکهاتی د ناڤبەرا حکومەتا فیدرالی یا عیراقێ و حکومەتا هەرێما کوردستانێ پابەند کریە کو د ماوێ سێ مەهان دا پرۆسەیا ب بانکیکرنا مووچەیێ فەرمانبەران و مووچەخۆرێن هەرێما کوردستانێ ب دووماهی بینن، ب پێی هەمی ڕێککەفتن و بریارێن ئەنجومەنێ وەزیرێن عیراقێ و وەزارەتا دارایی یا حکومەتا فیدرال دووماهیا ئەڤ سالە دووماهی مۆلەتە بۆ ڤەکرنا هەژمارا بانکی بۆ هەمی فەرمانبەران و مووچەخۆرێن هەرێما کوردستانێ.
شایستەی باسکرنێ یە کو ل چ وەڵاتەکی دوو جۆر شێوازێن دابەشکرنا مووچەی نینن، ژ لایەکی ب کاش و ژ لایەکی ب سیستەمێ بانکی، د نها ژی دا ل هەرێما کوردستانێ ب ڕێککەفتنا هەردوو حکومەتێن هەرێمێ و حکومەتا فیدرال مووچە ب سیستەمێ دیجیتاڵی دهێتە خەرجکرن، واتە دابەشکرنا مووچەی ب کاش نامینیت.
لەو لایێ، دووپاتیێ ل وێ چەندێ دکەین کو ل دووماهیا سەرێ سالێ مووچە تەنها ب ڕێیا پرۆژێ (هەژمارا من) ڤە دهێتە خەرجکرن، و هەر کەسەک پشکدار نەبیت د پرۆژێ هەژمارا من دا مووچە وەرناگریت و خۆ بەرپرسیار د بیت.