کاروان حەجی
پشتی ب دویماهیهاتنا هەلبژارتنان و راگەهاندنا ئەنجامان، ئەو فۆکسا ل سەر سەرۆککۆمارییێ ژ یا سەرۆکوەزیران، سەرۆکێ پەرلەمانی و وەزارەتان پترە.
بۆچی سەرۆککۆمار؟
سوننەیان د هەیاما چەندین سالان دا، چو مفایەک ژ سەرۆکێ پەرلەمانی نەدیتییە و ئەو هۆسا دبینن د بێ دەستهەلاتییا سەرۆککۆمارییێ دا دشێن گەلەک تشتان بدەسڤەبئینن.
«حەلبووسی چاڤ لێ یە»
بەرنامەیێ حەلبووسی د هەیاما بانگەشەیێ دا، گەهشتنا سەرۆککۆمارییێ بوو، هەمی هێزا خۆ دیارکر کو دشێت سوننەیان بگەهینیتە سەرۆککۆمارییێ و د دیدارەکا رۆژنامەڤانی دا ژی ئاماژە دا، عورفێ سیاسی ب دویماهی هاتییە و چو یاسایەکا ڤەبر ژی بۆ هندێ نینە.
پەیاما توند یا سەرۆک بارزانی!
سەرۆک بارزانی د دیدارەکێ دا ل دۆر حەلبووسی گۆتییە:”دڤێت سەرۆککۆماری بۆ سوننەیان بیت” ل دۆر وێ یەکێ ب کەنیڤە گۆت: “جارێ دێ زانین دێ چلێ هێت.”
ئەڤێ پەیاما سەرۆک بارزانی بێهیڤیبوونەک بۆ حەلبووسی ب گەهشتن سەرۆککۆمارییێ دروستکر.
سوننە چ دبێژن؟
عەزما موسەنا سامرائی و سیادەیا خەمیس خەنجەری، کو نوکە ل دژی حەلبووسی نە، وان پێ خۆش نینە حەلبووسی بگەهیتە سەرۆککۆمارییێ ژ بەر کو دێ هەژموونا وان دناڤ سوننەیان دا کێم کەت.
سیادە، زێدەتر نێزیکی پارتی یە و وەک هەڤپەیمان خۆ ل گەل پارتی دبینیت. عەزم ژی پێشتر دژی پارتی بوو بەلکو نوکە ل گەل پارتی هەڤپەیمانە و ل گەل پارتی ل پارێزگەهێن سەلاحەدین و دیالە پشکداری د هەلبژارتنان دا کر و پارتی شیا کورسییەکی ل گەل عەزم ل خانەقین- دیالە ببەت.
نوکە ل گەل سوننەیان پارتی ب ڤێ یەکێ دشێت یارییەکا سیاسی یا بهێز بکەت.
بۆچوونا ئێکەتییێ!
ئێکەتی ژ خۆ پشتراستە کو د یارییا سەرۆککۆمارییێ دا بێ هەڤڕکە و دشێت ببەت، ئەو ژی پشتگەرما چارچۆڤەیێ هەماهەنگییێ یە، لێ رەنگە ڤێجارێ پۆستێ سەرۆککۆمارییێ بکەڤیتە سەر مێزەیا دانوستاندنێن پارتی و ئیکەتی بۆ پێکئینانا حکومەتا ئیراقێ.
چارچۆڤەیێ هەماهەنگییێ
چارچۆڤەیێ هەماهەنگییێ، هۆسا هزردکەت ئەگەر سوننە گەهشتنە سەرۆککۆمارییێ رەنگە دەستهەلات و هەژموونا وان د ئیراقێ دا بهێز بیت و جارەکا دی ڤەگەرنە ئیراقێ.
ئیران و چارچۆڤەیی سەرۆککۆمارەک دڤێت کو کورد بیت و بێهێز بیت دروست وەک لەتیف رەشیدی بیت.