هندەک تایبەتمەندیێن نوی بۆ تیكتۆكێ هاتنە زێدەکرن.
پلاتفۆڕما “تیکتۆک” بۆ باشترکرنا ڕەوشا ساخلەمی و دەروونیا بکارئینەرێن خۆ، کومەکا تایبەتمەندیێن نوی ئێخستنە کار کو تەئکیدیێ لسەر بکارئینانا ساخلەم دکەنەڤە. کۆمپانیایێ لاپەرێ “بڕێڤەبرنا دەمێ مانێ لسەر شاشێ” دیزاین کریەڤە و چەندین ئامرازێن وەک دەفتەرا تێبینیان بۆ گۆتנێن ئەرێنی، زێدەتر ژ ١٢٠ بیرئینانێن ڕۆژانە، پشکا ڕاهێنانا هەناسەدانێ و بەرهەمئینەرەکێ دەنگی بۆ پەخشکرنا دەنگێ سروشتی و هێورکەرەڤە تێدا زێدەکرینە، ئەڤە ژی بۆ هندێ یە کو بکارئینەر بشێن ئارمانجێن ڕۆژانە بۆ خۆ دیار بکەن.
وەک هاندەرەک بۆ سنوردارکرنا دەمێ بکارئینانا ئەپێ، تیکتۆک سیستەمەکێ خەلاتکرنێ دانا کو “نیشان” (Badge) د بەخشیتە وان بکارئینەرێن ئەرکێن ساخلەمیێ بجهـ دئینن. بۆ ب دەستڤەئینانا ڤان نیشانان، پێدڤیە بکارئینەر چەند هەنگاڤان بهاڤێژن، وەک دوورکەفتن ژ بکارئینانا پلاتفۆڕمێ د شەڤ دا بۆ مسوگەرکرنا خەوا پێدڤی، بکارئینانا ئامرازێن تێڕامانێ (Meditation)، یان دانانا سنورەکێ دەمکیێ ڕۆژانە بۆ ئامیران؛ کۆمپانیایێ ئاماژە ب وێ یەکێ کریە کو ئەڤ شێوازە لسەر بنەمایێ ڤەکۆلینێن ئەکادیمی هاتیە دارێژتن و کارتێکرنا وێ باشترە ژ دانانا سنورێن گەلەک دژوار بۆ سینێلان.
ل دویڤ تاقیکرنێن دەستپێکی، دیاربوویە کو بکارئینەر زێدەتر ژ جاران ئامرازێن سەلامەتیێ بکار دئینن، لەورا کۆمپانیایێ بڕیار دایە د دەمێ بکارئینانا زۆرا ئەپێ دا یان د شەڤان دا، ڕاستەوخۆ بەستەرێ ڤان ئامرازان بۆ بکارئینەری دیار بکەت. ئەڤ هەنگاڤە ژی تەمامکەرێن وێ زنجیرا ڕێکارانە کو تیکتۆک و کۆمپانیایێن تەکنۆلۆژی یێن دی یێن وەک مێتا و یوتیوب د ماوێ بۆری دا گرتینە بەر، ژ وان ژی کاراکرنا ئامرازێن چاڤدێریا خێزانی و پاراستنا سینێلان ژ کارتێکرنێن نەرێنی یێن پلاتفۆڕمێن دیجیتاڵ.
کۆمپانیایێ ڕاگەهاندییە کو د تاقیکرنان دا دیاربوویە ئەڤ ئامرازە کارتێکرنەکا باش هەبوویە و بکارئینەران زێدەتر بەرهەڤیەک بۆ لایەنێ سەلامەتیا ساخلەمیێ نیشا دایە. ئەڤ هەنگاڤە ژی تەمامکەرا وان ئامرازێن چاڤدێریا خێزانی یە کو بەری نها و د مەها تەمموزێ دا هاتبوونە کاراکرن.