جەماوەرێ خۆڕاگر، خانەوادەیا سەربەرزا شەهیدان و پێشمەرگەیێن قارەمان
ئەڤرۆ بە شانازیڤە یادا دامەزراندنا پارتیا خۆ دکەینەڤە، ئەو پارتیا داکۆکیکارەکا ڕاستەقینە یا بەرژەوەندیێن گەلێ مە، ئەو یادا کو وێستگەهەکا هەرە گرنگا خەباتا مێژوویی یا بزاڤا ڕزگاریخوازیا کوردستانێ و کاروانەکێ بێبەهنڤەدانێ تێکۆشانا سیاسییە بۆ داکۆکیکرنێ ژ مافێن نەتەوەیی و نیشتمانی و بنەمایێن دیموکراسیێ، هەروەسا بیرهینانا خەباتەکا تەمەن هەشتێ سالیا وەرچەرخان و قوربانیدان و ئەزموون و سەرچاوەیێ سروشێ بەهایێن ئازادی و دیموکراسیێ ژی یە.
ئەو بۆنەیە تەنێ بیرهینانەکا ڕاگوزەری یا دامەزراندنا پارتەکا سیاسی نینە، بەلکو بەرجەستەکرنا ئیرادەیا ئازادیخوازانەیە بۆ ڕەتکرنا پیلانا دوژمنان و زۆلم و زۆرداریێ ل سەر ڕێبازا حەکیمانە یا “بارزانیێ نەمر” کو ئهو دهم زەمینەیەکا سەردەمیانە بۆ چەمکێ کوردایەتیێ داڕشت و ب پەیڕەوکرنا بەهایێن شۆڕشگێڕی، پەرە ب بزاڤا ڕزگاریخوازیا کوردستانێ دا. خەباتا هەمەلایەنە یا پارتیا مە ل شۆڕشێن ئەیلوول، گوڵان، ڕێککەوتنامەیا ١١ی ئادارێ و ڕاپەڕینا ١٩٩١، گەواهییا وێ چەندێ ددەن کو هێزەکا پێشەنگ و پشتئەستوورە ب جەماوەری و هەمی پێکهاتێن نەتەوەیی و ئاینییان و هەردەم ب کلتوورێ دیالۆگێ هەوڵ بۆ ب دەستڤەئینانا ئارمانجێن نەتەوەیی دایە.
ل یادا هەشتێ سالیا دامەزراندنا پارتیا مە دا جەختێ ل سەر وێ چەندێ دکەینەڤە، کو وەفاداری بۆ مێژووا پارتی و قوربانیدانا تێکۆشەرێن وێ تەنێ بیرهینان نینە، بەلکو ئەزموونا وێ ڕابردوو و مێژوویێ، بەرپرسیاریەتیەکا نەتەوەیی و نیشتمانییە بەرامبەر نوکە و ئایندهی ب ڕێیا پاراستنا دەستکەفتێن مە و دوورئێخستنا هەرێما کوردستانێ ژ وان ئاڵۆزیێن سیاسی و گرژی و شەڕ و پێکدادانێن دەوروبەرێن مە، هەروەسا پاراستنا کوردستانێ و ڕێگری ل هندێ کو ببیتە جهەک بۆ کاریگەریخستنە سەر ئەمنیەیتا جیرانێن مە و ڕێزگرتنا دوولایەنە یا بەرژەوەندییان و، ب هێزکرنا پێگەهێ دەستووریێ هەرێمێ و کاراکرناڤە یا پەرلەمانی وەکو ئەرکەکێ مێژوویی و پێکهێنانا کابینەیا دەهێ و حکومەتەکا ب هێز، هەروەسا ب هێزکرنا ئێکڕیزیێ و ڕێزگرتن ل فرەییا پێکهاتان و پپتەوکرنا سەقامگیری و ئاشتیێ ل هەرێمێ. خەڵکێ خۆڕاگر و پشوودرێژێ هەرێما کوردستانێ ل وان سالێن بوریدا سەلماندیە کو حەزژێکرنا نیشتمان و گەلێ خۆ ل سەری هەمی بابەتەکێ دیترە، ژبەر هندێ ب ئەرکێ خۆ دزانین ب هەمی تواناڤە کار بۆ چارەسەرکرنا ئاریشە و گرفتان بکەین ب ئاڕاستەیا دابینکرنا ئاسایش و پێداویستیێن ژیانەکا سەرفرازانە.
ل یادا (١٦)ی ئابێ دا، دەستێ دۆستایەتیێ و پێكڤەکارکرنێ بۆ تەواوی لایەنێن سیاسیێن بەشدار ل پڕۆسەیا سیاسییا عێراقێ درێژ دکەین، ئەرکێ مە هەمیانە ب جیاوازیا بیر و بۆچوونێن سیاسی، باوەریا ئاینی و مەزهەبیڤە پێکڤە هەوڵ بدەین عێراق بۆ هەمیان بیت و دوور بێخین ژ تێوەگلانێ ل شەڕ و ئاژاوەیێن دەڤەرێ و، هەمی پێکهاتە پێکڤە ب بەرپرسیاریەتیڤە شێوازەکێ حوکمرانیا دروست و سەردەمیانە بگرنە بەر، ئەڤە ژی ژ پێناو بەرژەوەندیا خەڵکێ عێراقێ، هەر وەکو ب ئاشکرا مە گوتی عێراق تووشی ئاریشەیێن زۆر هاتیا کرن، ڕەوا نینە چیدی ل وێ بازنەیێ بزڤڕیت، چونکی خەڵکێ عێراقێ چیدی بەڕگەیا وان هەمی نەهامەتییان ناگریت، ئەڤە ژی بەرپرسیاریەتیەکا ئەخلاقی، نیشتمانی و ئاینییە.ا
ب وێ بۆنەیا مێژوویی قوربانیدانا تێکۆشەران و پێشمەرگە و شەهیدان بەرز دەنرخێنین و ئەوانێن گیانێ خۆ ل پێناو ماف و ئازادی و سەروەریا نەتەوە و خاک و گەلێ مە بەخشین، هەروەسا تێکۆشان و کۆڵنەدانا نەوە ل دووی نەوەیێن ڕێیا پارتایەتیێ و ڕێبازا بارزانیێ نەمر.
ل ڤێ یادا پڕ شکۆدا، پەیمانێ بۆ گەلێ کوردستانێ و سەرۆک (مەسعود بارزانی) دووپات دکەینەڤە کو ل سەر ڕێبازا ڕەسەنا کوردایەتیێ بەردەوام بین بۆ پاراستنا قەوارەیێ هەرێمێ و ب هێزکرنا بنەمایێن دیموکراسیێ و پێكڤەژیانێ.
سڵاڤ بۆ دامەزرێنەر و ڕابەرێ ڕێبازا کوردایەتیێ (مستەفا بارزانیێ نەمر) و کاکە (ئیدریسێ هەردەم ل یاد) و سەرجەم شەهیدێن کوردستانێ.
سوپاس و پێزانین بۆ کادیر، ئەندام و لایەنگرێن پارتیا مە، هەروەسا گەرمترین پیرۆزباهی ل پێشمەرگەیێن قارەمان و خەڵکێ خۆڕاگرێ کوردستانێ دکەین.
سەرکەفتن بۆ خەباتا ڕەوا یا گەلێ مەیە، بەرز و شەکاڤە بیت ئاڵایا کوردستانێ.
مەکتەبا سیاسی یا
پارتی دیموکراتی کوردستان
١٦ی ئابا ٢٠٢٦
