ئەڤرۆ سەرۆک بارزانى ل پیرمام ل گەل شاندەکێ ئەمریکا ب سەرۆکایەتییا جۆشوا هاریس، رێکخەرێ کاروبارێن بالیۆزخانەیا ئەمریکا ل بەغدایێ کۆمبوو، د کۆمبوونێ دا کو گویندەلن گرین، کونسلا گشتى یا ئەمریکا ل هەولێرێ ژى ئامادە بوو، رێکخەرێ کاروبارێن بالیۆزخانەیا ئەمریکا پیرۆزباهییا پرۆسەیا هەلبژارتنێن جڤاتا نوینەرێن ئیراقێ ل سەرۆک بارزانى کر و سوپاسییا بزاڤێن وى کر ژبۆ سەرخستنا پرۆسەیا هەلبژارتنان.
هەروەسا بەحس ل گاڤێن پشتى هەلبژارتنان یێن ئالیێن سیاسى یێن ئیراقى کر، بۆ وێ یەیکێ کابینەیا نوى یا حکومەتا فیدرالا ئیراقێ بهێتە پێکئینان و پەیوەندیێن ناڤبەرا حکومەتا هەرێما کوردستانێ و حکومەتا فیدرال ژى ئالییەکێ دى یێ کۆمبوونێ بوو.
ژ ئالییێ خۆ ڤە سەرۆک بارزانى بخێرهاتنا شاندێ مێڤان کر و رۆناهى دا سەر قۆناغا پشتى هەلبژارتنان ل ئیراقێ و پێکئینانا کابینەیا نوى کو رەنگڤەدانا خواستا تەمام یا گەلێ ئیراقێ بیت و ل سەر بنەمایێ دەستوورى بهێتە پێکئینان.
هەر د کۆمبوونێ دا سەرۆک بارزانى دوپاتى ل بەردەوامییا بزاڤێن دانوستاندنان د ناڤبەرا هەمى ئالیێن کوردستانى دا کر بۆ پێکئینانا کابینەیا نوى یا حکومەتا هەرێما کوردستانێ.
د پشکەکا دى یا دیداری دا گوهۆڕین و ئاستەنگێن ل ناوچێ دروست دبن هاتنە بەحسکرن و هەر دو ئالی هەڤڕابوون ل سەر پێشخستن و بەردەوامیدان ب پەیوەندیێن ناڤبەرا ئەمریکا و هەرێما کوردستان و ئیراقێ.