ئهڤڕۆ شاشهیێن بچووك یێن موبایلان بووینه پهنجهرهكا مهزن بۆ دیتنا جیهانێ، مخابن ئهڤ پهنجهره ل جهێ كو ڕاستیێ نیشان بدهت وێنهیهكێ شێواندی و دوور ژ ڕاستیێ نیشانی تهخا گهنجان ددهت ، ئێك ژ مهترسیدارترین ئهو نهخۆشییێن كو میدیایا جڤاكی د ناڤ گهنجێن مه دا بهلاڤكری، نهخۆشییا ناڤودهنگیێ یه ب ههر بهایهكێ ههبیت.
میدیا شیایه مێشكێ گهنجی ب ئاراستهیهكێ ببهت كو بهایێ وی یێ مرۆڤایهتی و جڤاكی بتنێ ب ههژمارا فۆڵۆوهر و لایكێن وی ڤه گرێدای بیت گهنجێ مه ئهڤڕۆ د ناڤ زینداناپهسنا خهیالی دا دژیت ئهگهر پۆستهكێ وی بینهرێن كێم بیت تووشی تێكچوونا دهروونی و دلگرانیێ دبیت ، ئهڤه نهب تنێحهزا ناڤودهنگیێ یه ئهڤه بووه نهخۆشیهكا دهروونی كو ناڤێ وێ تێكهلبوونا دیجیتاڵی یه.
بۆ گههشتن ب گۆپیتكا ترێندێ گهنج ئاماده یه سنوورێن ئایینی و جڤاكی و ههتا یێن خێزانی ژی ببهزینیت ئهو تشتێ جاران ب شهرم یان تایبهتمهندیا خێزانی دهاته ناسین، نوكه بووه كهرهستهیێ بازرگانیێ بۆ كۆمكرنا بینهران، میدیایێ وهل گهنجی كریه كو هزر بكهت ئهگهر تو نه یێ ناڤداربی رامان تۆ نه یێ ههیی ، ئهڤه ژی مهزنترین كارهساته كو ل سهر ئاستێ هزركرنا تاكی دهێته ئهنجامدان.
د جیهانا میدیایێ دا ئێدی خودانێ باوهرنامهیێ و زانایێ جڤاكی جهێ وان یێ دیار نینه، ئهو كهسێ سێرکێ چێدكهت و كارێن سهیر دكهت، دبیته سهرمهشق ئهڤێ چهندێ وهسا ل گهنجان كریه كو دهست ژ خویندن و پهروهردهكرنا خۆ بهردهن و ب دووڤ ڕێكێن كورت یێن ناڤودهنگیێ دا بكهڤن ، ئهڤه تێكدانا سیستهمێ بهایانه د جڤاكی دا كو ل پاشهرۆژێ دێ نڤشهكێ ڤالا ژ ناڤهرۆكێ بهرههم ئینیت.
دووڤچۆنا ناڤودهنگیێ نهخۆشیهكا بێدهنگه بێهۆشكرنامێشكی یه كو میدیا ب مهرهم یان بێ مهرهم د ناڤ گهنجان دا چاندیه ، ئهركێ خێزانێ و سازیێن پهروهردهیی و ڕهخنهگرایه كو گهنجی ژ ڤێ خهونا درهوین هشیار بكهنه ڤه ، پێدڤیه گهنج بزانیت كو بهایێ مرۆڤی ب ئهوێ ناڤهرۆكا ئهو پێشكێشدكهت دهێته پیڤان نه ب ئهوێ دهنگوباسا ل دۆر وی دهێته کرن.