پەیاما ئێكەتیا زانایێن ئایینێ ئیسلامێ ل كوردستانێ ل دۆر روودانێن حەلەبێ
ئێكەتیا زانایێن ئایینێ ئیسلامێ ل كوردستانێ، پەیامەكا توند ل سەر روودانێن حەلەبێ بەلاڤكر و راگەهاند؛ ئارمانجكرنا كوردان و خەلكێ سڤیل دژی بنەمایێن ئایینێ ئیسلامێ یە و ژبلی “دەمارگیرییا كویرە” چ بهانەیێن دی نینن.
ئەڤرۆ ئەینی، 9ێ كانوونا دویێ یا 2026ێ، ئێكەتیا زانایێن ئایینێ ئیسلامێ ل كوردستانێ د بەیاننامەیەكێدا راگەهاند: “ئارمانجكرنا كوردان و خەلكێ سڤیل ل هەردوو گەڕەكێن شێخ مەقسوود و ئەشرەفیە ل حەلەبێ، ب هەمی پێوەران دژی بنەمایێن ئایینێ پیرۆزێ ئیسلامێ و مافێن مرۆڤی و یاسایێن نێودەوڵەتی یە”.
د بەیاننامەیێدا هاتیە: “چ یاسا و مەژوویەك (لۆژیك) ژبلی دەمارگیرییا كویرە، رێكێ ب وان هێرش و كوشتن و ستەما مەزن نادات”.
ئێكەتیا زانایان دگەل سەركۆنەكرنا توند یا وان هێرشان، داخواز ژ جڤاكێ نێودەوڵەتی كریە بێدەنگ نەبن. هەروەسا داخواز ژ كەسایەتیێن ئایینی یێن كورد و عەرەب ل ناڤ سوریا كریە، ب بەرپرسیارەتی رۆلێ خۆ ببینن و ببنە ئەگەرێ هێوركردنەڤێ، نەك “پفكرن د ئاگرێ شەڕیدا”.
ل دوماهیێ، ئێكەتیێ داخواز ژ حوكمەتا سوریا كریە دەستدرێژیان راوەستینیت و ل شوونا گەمارۆ و شەڕی، دانوستاندن و دیالۆگێ بكەتە هەوینێ ئاڤاكرنا سوریایەكا نوو.
