ئەڤرۆ سێشەمبی، 20ـێ کانینا دووێ 2026، کۆمسیۆنا بلندا پەنابەران یا سەر ب نەتەوەیێن ئێکگرتی (UNHCR) د
ڕاگەهاندنەکێ دا بەلاڤکر، کو ل باکورێ ڕۆژهەلاتا سوریایێ هزاران کەس ئاوارە بوونە.
کۆمسیۆنێ تەئکید ل وێ یەکێ ژی کر؛ کو ئەو یێن بەردەوامن ل گەهاندنا هاریکاریان و هەول ددەن پشتڕاست ببن کو هاریکاری و پێدڤی ب شێوەیەکێ گونجای دگەهنە دەستێ ئاواران.
کۆمسیۆن دبێژیت ژی: نێزیکی هزار و 700 خێزان ژ تەبقە بەرەڤ قامشلۆ ڕەڤینە. هەروەسا 102 خێزان گەهشتینە کەمپا نەورۆز کو UNHCR فریاگوزاری و جهێن حەواندنێ یێن سلامەت دابین دکەت. دگەل هندێ ژی، کۆمسیۆنا بلندا پەنابەران یا سەر ب نەتەوەیێن ئێکگرتی و هەڤپشکێن وێ یێن بەردەوامن لسەر دابینکرنا پێدڤیێن مرۆیی یێن ب لەز.
سەرەڕای هەبوونا ڕێککەفتنا ئاگر بەستێ، گرژی و ئالۆزی ل باکورێ ڕۆژهەلاتا سوریایێ یێن بەردەوامن و شەر د ناڤبەرا هەسەدێ و سوپایێ عەرەبی یێ سوریایێ دا ل چەندین میحوەران درێژەیا هەی.
هێزێن سوریایا دیموکرات (هەسەدە) د ڕاگەهاندنەکێ دا ئاشکرا کر، کو نها شەرەکێ دژوار ل دەوروبەرێن زیندانا “تەقتان” هەیە. هەڤدەم، شەر و پێکدادان ل دەڤەرێن ڕەققا، شەدادێ و عەین عیسا یێن بەردەوامن.
دوهی دووشەمبی 19ـێ کانینا دووێ 2026، فەرهاد شامی، ڕێڤەبەرێ ناڤەندا ڕاگەهاندنا هێزێن سوریایا دیموکرات (هەسەدە) ل تۆڕا جڤاکی یا (ئێکس) پەیامەک بەلاڤ کربوو و تێدا ئاماژە دابوو، هەموو تشتەکی د پێناڤ گەلێ خۆ دا دکەین؛ ل بەردەم دوو بەربژاران داینە، یان ژیانەکا ب شکۆ دژین، یان شەهادەتەکا سەربلندانە هەلدبژێرین.
ژ لایێ خۆڤە، فەوزا یوسف، ئەندامەکا دەستەیا سەرۆکاتیا پەیەدێ ل تۆڕا جڤاکی یا (ئێکس) نڤیسیە: بانگەوازەکا ب لەز، گەلێ مە ل باکورێ کوردستانێ دڤێت بەرەڤ باژێرێن نسێبین و سرووج بچن، چونکی ڕۆژئاڤا ل ژێر هێرشەکا دژوار دایە و کورد دهێنە کۆمکوژکرن.
دبێژیت ژی: پێدڤیە گەنج و خەلکێ باشوورێ کوردستانێ ژی بەرەڤ دێرکێ بچن و سنووران دەرباز بکەن بۆ ب هاناچوونا خوشک و برایێن خۆ و ئەڤرۆ ڕۆژا پاراستنا شکۆیا نەتەوەیی یە.
ئەڤە ژی د دەمەکێ دایە، ئێڤارا دووشەمبی، مەزڵووم عەبدی، فەرماندێ گشتیێ هێزێن سوریایا دیموکرات (هەسەدە) ب مەرەما کۆمبوونێ دگەل ئەحمەد شەرع گەهشت بوو دیمەشقێ، حەتا نها چ زانیاری لسەر ناڤەرۆکا کۆمبوونێ نەهاتینە ئاشکراکرن.