ڕۆژ ئاڤا د ناڤبەرا دوو خەنجەرێن ژەهرکری دا
محەمەد عارف تاتار
کوردستانا ڕۆژئاڤا ئێک بوو ژ مەلبەندێن سەرەکی یێن شارستانیەتا کوردان یا کەڤنار، پایتەختێ وێ (واشۆکانی) بوو. چەندین شارستانیەت ل وی جهی هاتنە دامەزراندن مینا: میتانی، خوری، کاشی… هتد.
د پرانیا دیرۆکا هەڤچەرخ دا، هەمی هەول هاتینە دان بۆ جێبەجێکرنا سیاسەتا لابرنا ناڤێ (کوردستان) ل سەر نەخشێ ڕۆژهەلاتا ناڤەڕاست، هەر ژ شەڕێ چالدێرانێ ١٥١٤ز و تا نوکە.
پشتی هەرفاندنا رژێما بەشار ئەسەدی ل سوریێ، خەونەک بۆ کوردان پەیدابوو ل ڕۆژئاڤا کو تاما ئازادیێ ببینن. لێ ب مخابنی ڤە، پشتی دامەزراندنا سوریایا نووی و دەستهەلاتداریا (ئەحمەد شەرع) و ئەو بیروبۆچوونێن توندرەو و مەترسیدار، گەلێ کورد کەفتە د گومانێ دا و تووشی دوو خەنجەرێن ژەهرکری بوویە:
خەنجەرا ئێکێ:
خەنجەرەکا سنگ ب سینگە دگەل ڕژێما نووی، کو ب ئاشکرایی کوردان دکوژن و مافێن وان بن دەست دکەن؛ ئەڤەژی دبیتە ئەگەرێ هندێ کو هزرێن داعشی جارەکا دی سەرهەلدەنەڤە.
خەنجەرا دووێ:
ئەو خەنجەرا ژەهرکری یا نێڤدەولەتییە، کو گەلەک جاران وەلاتێن بیانی ل پشتا کوردان دایە ب درێژاهیا دیرۆکێ و دەست ژ پشتەڤانیا کوردان بەردایە ژ پێخەمەت بەرژەوەندیێن خۆ.
ئیدی بەسە چارەنڤیسێ پارچەکا کوردستانێ بهێتە گوهۆڕین، یان ببیتە تاقیگەهەک بۆ سەربۆران، یان ببیتە دەرگەهەک بۆ بکوژ و تیرۆرستان کو یاریێ ب ژیانا خەلکی بکەن. ڤەگەریان بۆ ناڤ مالا کوردی بژاردەیا ڕاستەقینە یە بۆ قورتالبوونێ ژ هەمی خەنجەران.