ناسيوناليسم يان ژى……؟
ناسيوناليسم ژ لايێ پهيڤ و ڕامانێڤه ژ رێشا لاتينى هاتييه ، د ئنگليزيدا (نهشنال)مللهت ، نهتهوه ،پشتى هنگى د زمانێ فهرهنسيدا بو چهمكهكێ سياسى و ب چهند ڕامانێن جياواز دهربڕين لێ هاته كرن وهك :
ناسيوناليسما كۆلتۆرى ، ناسيۆناليسما شارستانى ، ناسيۆناليسما سياسى ، ناسيۆناليسما نهتهويى
ناسيۆناليسما كۆلتۆرى : داكوكيێ ل سهر زمان و كولتۆر و داب ونهريتێن ههڤپشكێن نهتهوهيى دكهت.
ناسيۆناليسما سياسى : داكوكيێ ل سهر دهستهههلاتا مللهت ل سهر مللهتى دكهت واته : مللهت بو مللهت.
ناسيوناليسا شارستانى: مللهت بو ياسا و ههڤوهلاتيبوون.
ناسيۆناليسما نهتهوهيى : مللهت ل سهر بنچينێ ههڤخوينبوون . و ههڤرهگهزى . و ئێكنهتهوهيى..كو نهۆ ب چهمكێن جياواز دهێته پێناسهكرن مينا ، نهتهوهپهرست ، مللهتگهرايى ، مللى گهرايى نهتهوهيبوون هتد …يا مه دڤێت ل سهر بپهيڤين ناسيۆناليسما نهتهوييه يان ههمان نهتهوهخوازى
ئايا ئهم كورد پێدڤييه نهتهوهخواز بين يان پێدڤى ناكهت؟
كورد كهڤتينه دهڤهرهكا جۆگرافييا تايبهت دگهل هندهك نهتهوهيێن دى مينا عهرهب ، فارس ، تورك كو دبێژنێ رۆژههلاتا ناڤين. دناڤ كيشوهرێ ئاسيادا..ئهڤ جۆگرافييه جياوازييهكا زۆر دگهل وهلاتێن ئۆرۆپى ههيه. ژ لايێ جۆرێ جۆگرافى ، كۆلتۆرى ، داب ونهريت، هزرێن جياواز، ئاينێن جياواز، و تا مێژووا دێرين و سهددان بيرو بوچوونێن جياواز و ئايدۆلوژيێن ههمهڕهنگ ژ ئايينى و نهتهوهيى ههر وهسا ژ بلى دگهل ئۆرۆپا ئهڤ جياوازييه دگهل خوژى ههنه واته ههر نهتهوهيێن رۆژههلاتا ناڤين دگهل ههڤدوو. بدرێژاهييا مێژووى ب ئهگهرا نهتهوهپهرستى و ئايدۆلوژيێن تايبهت بخۆڤه هێرش كرينه سهر ههڤ و كارهسات وكوشتن وتالان وداگيركرن رويداينه و ههتا پشتى داگيركاريێ ژى ههولداين هزرو بيرو بوچوون وئاينێ خۆ ژى ل سهر نهتهوێ داگيربووى بسهپينن و بو وان بسهلمينن كو نهتهوێ مه ژ هنگو نفش پاكژتره. و پيدڤييه هوين بهێنه ژێر خواست و ويست و ئايينێ مه يان دێ وه كۆژين !!
ههر ئهڤ چهنده دههان جاران ب سهرێ كوردان هاتييه ژ لايێ تورك وفارس وعهرهبانڤه و چهندين جار هاتنه جينۆسايدكرن ههر ژ چهرخێ 19ێ و 20ێ و 21ێ هێشتا ئهڤ جۆره نهتهوهپهرێسى يا بهردهوامه و هێشتاژى كورد دهێنه كۆشتن وتالانكرن وداگيركرن !..ههر چهند مێژوو شاهده كورد مللهتهكێ ئاشتيخوازن و بهرپهڕێن مێژووى تهژييه ژ نهتهوه و ئاينێن جياواز كو دناڤ كوردان ژياينه كا چهوا سهرهدهرييا جوان ومرۆڤانه دگهل وان هاتييه كرن ژ لايێ كوردانڤه لێ ب مخابنيڤه ب پيچهوانه چهند كورد ب مرۆڤايهتى دگهل دهوروبهرێن خو كرييه وان سهرهدهرييهكا نامرۆڤانه و توندڕهوانه دگهل كوردان كرينه ڤێجا مه بڤێت يان نهڤێت ئهڤهيه بارهدۆخێ رۆژههلاتا ناڤين و پێدڤييه خۆ دگهل بارهدۆخێ ڕاستهقينه يێ رۆژههلاتا ناڤين بگونجينين بهس ب چ رهنگ ؟
يا دياره دهمێ راستييا نهتهوهيێن چار رهخى ته و ئايدۆلۆژييا وان ئهڤه بيت..خۆكوژييا نهتهوييه ئهگهر ناسيۆناليسمى نهبى ، تو نكارى سهرهدهرييهكا ديمۆكراتى وهك ئۆرۆپييان دگهل وان بكهى!!..نكارى وان تێبگههينى كو مرۆڤ ههمى وهك ههڤن و دناڤبهرا مرۆڤان چ جياوازى نينه ههمى خودان ماف و ئاخ و وهلاتن ئايا دێ شێن ڤى كارى بكهن ؟!!!!
و دڤى دهمى دا كو دبينين دوژمنێن مه ب هێجهتا كوردبوونێ هێرشان ل دژى مللهتێ مه ئهنجام ددهن ئهم نهچارين كو پێداگريێ ل سهر كوردبوونا خو بكهين و پێداگريكرن لسهر ڤێ چهندێ رێكا خو د زهق كرنا خالێن ههڤپشك و لاوازكرنا خالێن جياوازكهر دبينيت.
بو نموونه خالێن مينا جلوبهرگ و زمان و ئالا …هتد پێدڤييه بهێته زهقكرن و خالێن مينا ئايين و عهشيرهت و … هتد دهبيت د ڤى سهردهميدا وهك فاكتهرێن جياوازكهر نههێنه ديتن و ل دوماهييێ ئهم دبينين بێى كو مه بڤێت دوژمنێن مه يين مه نهچاردكهن بهرهڤ ناسيوناليسمێڤه بچين و ئهڤ برياره وهك چهكێ بهرگريێ دهێته ديتن و ئهڤ بريارا ناسيوناليسمبوونێ چ يا دروست بيت يان خهلهت بيت جارێ دڤى بارهدوخيدا تهنها ميكانيزما مانا ڤى مللهتى و بهايين وێنه ڤێجا يان ناسيوناليزم بو ڕاگرتنا مللهتى يان ژى پهرتهوازييا نهتهوهيى ولاوازبوون.
