مەسروور بارزانی د کۆمبوونا جڤاتا وەزیران دا هوشداری ل دۆر دەرئەنجامێن دەستکاریکرنا ئەنجامێن سەرژمێرییا گشتی یا ئاکنجییان ژ ئالییێ بەغدا ڤە دا و راگەهاند؛ ئەو گاڤە بنپێکرنا رێککەفتنانە و دێ کاریگەرییەکا نەرێنی ل سەر شایستەیێن هەرێمێ هەبیت.
چارشەمبییێ 11ێ شوباتێ 2026ێ، جڤاتا وەزیرێن هەرێما کوردستانێ ب سەرپەرشتییا مەسروور بارزانی کۆمبوو.
مەسروور بارزانی راگەهاند: جڤاتا وەزیران هەلویستێ خۆ یێ فەرمی ل دۆر ئەنجامێن سەرژمێرییا ئیراقێ ئێکلا کرییە و هەر جۆرە دەستکاریکرنەکێ د رێژەیا ئاکنجییێن هەرێمێ دا رەت دکەت.
مەسروور بارزانی دلگرانییا خۆ بەرانبەر رەفتارا وەزارەتا پلاندانانا ئیراقێ دیارکر و گۆت: “وەزارەتا پلاندانانێ ل دەرڤەیی بڕیارێن حکومەتا ئیراقێ و بەروڤاژی رێککەفتنا هەڤپشک یا هەردو حکومەتان، سەرەدەری ل گەل ئەنجامێن فەرمی یێن سەرژمێرییێ کرییە“.
سەرۆکوەزیرێ هەرێمێ هوشداری دا کو ئەڤ گاڤا بەغدا “دێ کاریگەرییەکا نەرێنی ل سەر شایستەیێن دارایی و یاسایی یێن هەرێما کوردستانێ هەبیت” و دوپاتکر کو “بۆ راستڤەکرنێ رەوش پێدڤی ب رێکارێن بلەز هەیە.”
مەسروور بارزانی هەروەسان هەلویستێ حکومەتا هەرێمێ دوپاتکر و گۆت: “جڤاتا وەزیران دەستکاریکرنا رێژەیا ئاکنجییێن هەرێمێ ژ ئالییێ وەزارەتا پلاندانانا ئیراقێ ڤە رەت دکەت و دێ گاڤێن پێدڤی بۆ راستڤەکرنا شاشیان گریتەبەر“.
هەروەسان داخواز ژ حکومەتا ئیراقێ کر پابەندی رێککەفتنێن هەڤپشک بیت و دانپێدانێ ب ئەنجامێن فەرمی یێن راگەهاندی یێن سەرژمێریێی بکەت کو رێژەیا هەرێما کوردستانێ ب 14.1% جهگیرکرییە.