د رهمهزانێ دا پاراستنا كهرامهتا ههژاران ژ لایك و بینهران بهاتره
رهمهزان زهكهریا
سالانه دگهل هاتنا ههیڤا رهمهزانێ، میدیا سیستهمهكێ نوویێ بهرنامهیا دانێن كو پتر ب ئاینی و جڤاكی و ساخلهمیێ و خێرخوازیێ ڤه گرێداینه. پێدڤیه میدیا خۆ ژ بهرنامهیێن تهقلیدی دوور بكهن و كار ل سهر ئاڤاكرنێ بكهن، مه نهڤێت میدیایێ چاڤ ل هژمارا لایك و بینهران بیت مه دڤێت چاڤ ل چارهسهریێ بیت. بۆ نموونه نیشاندانا بهرنامهیهكێ ل سهر پاراستنا ژینگههێ و داب و نهریت و هاندانا گهنجان ب ئاڤاكرنێ و راوهستان ل سهر پێن خۆ نابیت ههموو ئارمانج تژی كرنا تایمێ رۆژێ بیت و گرنگ نهبیت چ هاتیه بهلاڤكرن و چ مفا گههاندیه جڤاكی.
میدیا دهمی ددزیت یان هزری ئاڤا دكهت؟ ئێك ژ ئاریشهیێن مهزن تێكههلكرنا كهیفخۆشیێ دگهل ئیهمالكرنا ئهقلی. پتریا بهرنامهیێن بهریكانا ل سهر بنهمایێ شانس و بهختێ دهێنه ئاڤاكرن، بێی كو مفا و پێزانینێن زانستی یان كلتۆری بگههینیت بینهری. میدیایا سهركهفتی ئهوه یا كو رێزێ ل دهمێ رۆژی گری دگریت و مێشكێ وی ب مژارێن بێ رامان ڤه تژی ناكهت.
زنجیرێن دراما یێن رهمهزانێ كاریگهریهكا راستهوخۆ ل سهر هزرا بینهری دروستدكهت. میدیایا سهركهفتی پێدڤیه چیرۆكێن هیڤی و سهركهفتنێ نیشان بدهت، نهك ئهوێن توندوتیژیێ و ژیانا نهساخلهم و بێزاریێ ل دهف بینهری دروست بكهت. ههیڤا رهمهزانێ دهمهكێ گونجایی یه بۆ نیشاندانا وان بهایێن كو جڤاكی پێ ب هێز دكهڤن و دبنه ئهگهرێ ئارامیا دهروونی.
ئێك ژ جوانترین كارێن میدیایێ د ههیڤا رهمهزانێ دا، ئهو بهرنامهنه یێن دبنه پرهك د ناڤبهرا زهنگین و ههژاران دا. بهلێ مهرجێ سهرهكی و سهركهفتنێ پاراستنا كهرامهتا مرۆڤی بن، گرنگه میدیا ببته زمانحالێ ههژاران، دگهل نیشاندانا برینا چارهسهریێ پهیدا بكهت بۆ دروستكرنا فشارێ ل سهر دهولهمهند و خێرخوازان، رهمهزان دهلیڤهیهكا زێرینه كو میدیا ژ رۆلێ خۆ یێ تەقلیدی دهركهڤیت و ببیته پشكهك ژ چارهسهریا كێشهیێن جڤاكی تایبهت تهخا ههژاران.
د رهمهزانێ دا سهركهفتنا ههر دهزگهههكێ میدیایی ب رێژهیا لایك و بینهران ناهێته پیڤهركرن، ب كاریگهریێ دهێته پیڤهركرن كو ل سهر رهفتار و ئهخلاقێ جڤاكی دهێلیت. میدیا دشێت ببته هێزا گوهۆرینێ ئهگهر نهبیتە هۆکارێ پهیداكرنا ئارامیێ و بلندكرنا ئاستێ هشیاریێ، ئهو دێ مینیت وهك ئامێرهكێ بازرگانیێ بێ ههست.
بینهر دخوازیت د شهڤ و رۆژێن رهمهزانێ دا جوانترین دیمهنا ببینن ههست ب ئارامیێ بكهن و زۆترین هاریكاریا ههژاران بهێتهكرن، ههژار وهك كهرهستهیهك نههێته نیشاندان وهك رۆكهش بلا ناڤهرۆك هاریكاری بیت و پاراستنا تایبهتمهندیێن مرۆڤایهتی، د یاسایێن ئهردی و ئاسمانی دا مرۆڤ بهاترینه.