شێخان میدیا
پەیاما سەرۆك بارزانی ب هەلكەفتا جەژنا نەورۆزێ
ب ناڤێ خودێ یێ بەخشندە و میهرەبان
ب هەلكەفتا جەژنا نەورۆزێ و سەری ساڵا ٢٧٢٦ی کوردی، پیرۆزباهییەکا گەرم ل مالباتێن سەربەرزێن شەهیدان و پێشمەرگێن قارەمان و هەمی کوردستانیێن خۆشتەڤی ل ناڤخۆ و دەرڤەی وڵاتی دکەم. هەروەسا جەژنا نەورۆزێ ل هەمی ئەو گەلێن جیهانێ و دەڤەرێ پیرۆز دکەم یێن کو نەورۆز بەشەک بیت ژ فەرهەنگ و دیرۆکا وان. هیڤیدارم ساڵەکا تژی خۆشی و بەختەوەری بیت بۆ هەمی لایەکی.
نەورۆز بۆ گەلێ کوردستانێ هەر دەم مژدەیا دەسپێکەکا نوو و ئومێدەکا تازە و سەرکەفتن ب سەر ستەمکار و سەختییاندا بوویە. ئەڤە وەک فەرهەنگەکا دەوڵەمەندا بەردەوامبوون و تێکۆشانێ بۆ گەهشتن ب ئازادی و ئاشتیێ د دیرۆکا گەلێ کوردستانێدا ڕەگێن کویر داکوتاینە.
نەورۆزا ئەڤساڵ هەڤدەمە دگەل گۆڕانکاری و ئاڵۆزی و گرژییەکا زۆر ل دەڤەرا مە و جیهانێ ب گشتی. د ڤی بارودۆخێ هەستیار و دیرۆکیدا، پێدڤییە پتر ژ هەر دەمەکی لایەنێن سیاسی هەماهەنگ و هاریکارێن ئێک بن و پشتەڤانێن بەرژەوەندی و ئارامی و ئاسایشا وڵاتێ مە بن.
هیڤیدارم نەورۆزا ئەڤساڵ ببیتە دەسپێکەک بۆ تەبایی و برایەتییا پتر د ناڤبەرا لایەنێن سیاسی و خەلکێ خۆشتەڤی یێ کوردستانێدا، و ئەڤ نەورۆزە و هەمی جەژنێن دی ب شادی و کامەرانی ب بورینن. ئومێدەوارم گەلێن دەڤەرێ دویر ژ شەڕ و گرژی و ئاڵۆزییان بشێن د ئاشتی و تەناهیێدا بژین.
نەورۆزا وە پیرۆز بیت و بمینن ب خێر و خۆشی.
مەسعوود بارزانی
٢٩ی ڕەشەمێ ٢٧٢٥ی کوردی
٢٠ی ئادارا ٢٠٢٦ێ