شێخان میدیا
گەلێ کورد و کوردستانییێن هێژا ل هەر دەرەکا جیهانێ بن،
ب گەرمی و ژ دل، جەژنا نەورۆزا نەتەوەیی و سەری ساڵا نوو یا کوردی ل هەوە و ل خێزانێن سەربەرزێن شەهیدان، پێشمەرگێن قەهرەمان و تمامیا هێزێن ئەمنی پیرۆز دکەم. هیڤیدارم ئەڤ جەژنە ببیتە ئەگەرێ ئارامی، تەناهی و بەختەوەریێ بۆ هەمووان.
نەورۆز دەربڕینەکا کویرە ژ مێژوویەکا تژی تێکۆشان و داستانێن خۆڕاگریا نەتەوەیەکێ کو هەر دەم ب ئیرادەکا ب هێز بەرەنگاری ستەمێ بوویە و چو جاران سەرێ خۆ دانەچماندیە. نەورۆز نیشانا شکاندنا تاریاتیێ و نووکرنا ژیانێ یە، ئەو راستییا مێژوویی یە کو د سەلمینیت چو هێز و چەک نەشێن گڕا ئازادیخوازیا د ناخێ کوردان دا ڤەمرینن.
ئەڤڕۆ ژی ئاگرێ نەورۆزێ بۆ مە بانگەوازەکا بەردەوامە بۆ کۆلنەدانێ، بۆ رووبەرووبوونا ئاستەنگان، بۆ تەبایی و پێکڤەییێ. گۆڕ و تینا مە یا ب هێزە دا کو ب ئیرادەکا نەورۆزی، دەستکەفتێن خۆ یێن دەستووری بپارێزین و فیدرالی و قەوارێ سیاسی یێ هەرێما کوردستانێ وەک بەرهەمێ خوینا شەهیدان و خەباتا سالێن درێژ، ب توندوتۆڵی و ب هێزی بهێلینەڤە.
ئەڤساڵ د دەمەکێ دا پێشوازیێ ل بهار و نەورۆزێ دکەین، دەڤەرا مە د رەوشەکا هەستیار و ئاڵۆز دا دەرباز دبیت. مەترسیێن شەڕی و لێکەفتێن وی ل هەر لایەکی دیار دبن. لەوما ئەرکێ مە هەموویانە ب بەرپرسیاریەتیەکا مێژوویی کار بکەین داکو هەرێما کوردستانێ و عێراقێ ژ ڤان ئاڵۆزییان دویر بگرین. ئاشتی و ئاشتیخوازی؛ مەزنترین هێزا مە نە و بتنێ د سایەیا سەقامگیریێ دا ئەم دشێین پاشەرۆژەکا باشتر بنیاد بنێین.
د پەیوەندیێن مە دا دگەل حکومەتا فیدرالا عێراقێ، دگەل دەستخۆشیێ ل هەر پێنگاڤەکا ئەرێنی، دوپات دکەینەڤە کو د ڤێ رەوشێ دا هەماهەنگی و هاریکاریا زێدەتر د ناڤبەرا هەولێر و بەغدا دا و بجهئینانا راستی یا دەستووری و سیستەمێ فیدرالی و پاراستنا مافێن هەمی پێکهاتەیان، تاکە گەرەنتییە بۆ عێراقەکا ب هێز و سەقامگیر. ئەم ل هەرێما کوردستانێ وەک هەر دەم دێ فاکتەرێ ئارامی و سەقامگیریێ مینین و دەستێ لێکتێگەهشتن و دۆستایەتیێ بۆ هەمووان درێژ دکەین.
هاوەڵاتییێن خۆشتەڤی یێن کوردستانێ،
داخوازێ ژ هەوە دکەم د دەمێ گەشت و سەیرانێن خۆ دا، ب هوشیاریەکا تەمام رەوشا سلامەتیا خۆ و خێزان و ئازیزێن خۆ ل بەر چاڤ بگرن. ب تایبەتی د ڤان رۆژان دا کو دەڤەرا مە د رەوشەکا ئاڵۆز و تژی ژ مەترسیێن شەڕی دا دەرباز دبیت، پێدڤییە هەموو لایەک زێدەتر ئاگەهداری خۆ بن.
دبێ پابەندی رێنمایێن هاتووچۆ و لایەنێن پەیوەندیدار بن، داکو ئەڤێ جەژنێ ب ئارامی و سلامەتی ببورینن و چو نەخۆشی یادا نەورۆزا مە تاڵ نەکەت. پاراستنا ژینگەهێ و سروشتێ جوانێ کوردستانێ، ئەرکەکێ نیشتمانی و نیشانا شارستانیبوونا مە یە و دبێ ئەم پابەند بین.
نەورۆز ل هەمی ئەو گەلان ژی پیرۆز بیت یێن کو ئەڤێ یادێ دکەنەڤە. خودایێ مەزن هەوە هەموویان و گەل و نیشتمانێ مە بپارێزیت و ئاشتی و ئارامی و دڵنیایی؛ بال بکێشیتە سەر دەڤەرا مە و تمامیا مرۆڤایەتیێ.