شێخان میدیا
ب توندترین شێوە سەرکۆنە و ریسواکرنا زنجیرە هێرشێن تیرۆریستی و دوژمنکاریێن بەردەوام دکەین یێن کو دهێنە سەر ئاکنجی و دامەزراوەیێن هەرێما کوردستانێ. دوماهیک ژ وان ژی، ئەو پەلامارا دوژمنکارانەیا سپێدەهیا ئەڤڕۆ بوو، کو ژ لایێ ئیرانێ ڤە ب مووشەکان هێرش کریە سەر بنگەهـ و بارەگایێن هێزا پێشمەرگێ کوردستانێ ل سنوورێ ئیدارەیا سەربەخۆیا سۆران.
یا ئاشکرایە کو هێزا پێشمەرگێ کوردستانێ هێزەکا یاساییە و د چوارچۆڤێ دەستوور و یاسایان دا کاروبارێن خۆ ئەنجام ددەت. هێزەکە ل دویڤ یاسا و ڕێسایێن ناڤخۆیی و نێودەوڵەتی و سیاسەتێن ئاشتیپارێزیێن هەرێما کوردستانێ رەفتار کریە، و هەر دەم فاکتەر و پارێزەرێ ئاسایش و سەقامگیریێ بوویە. چ جاران نەبوویە هەرەشە و مەترسی بۆ سەر چو لایەنان، ب تایبەتی جیرانێن هەرێما کوردستانێ. لەوما پەلاماردان ب ڤی رەنگی، پێشێلکاریەکا ئاشکرا یا سەروەریا خاکا هەرێما کوردستانێ و عێراقێیە و دژی هەمی بنەمایێن جیرانەتیا باش و رێسایێن نێودەوڵەتییە، ب تایبەت کو هەرێما کوردستانێ بێلایەنی د شەڕ و کێشەیێن دەڤەرێ دا پاراستییه و هەر دەم خوازیارا ئاشتی و پێکڤەژیانێ بوویە و دژی هەر جورە توندوتیژیەکێیە.
ژ ڤێرێ داوا ژ حکومەتا فیدراڵیا عێراقێ دکەین کو بەرپرسیارەتیا خۆ یا دەستووری هەلگریت و ب رێکا کەناڵێن دبلۆماسی و فەرمی، هەڵویستەکێ ئێکلاکەر هەبیت بۆ پاراستنا سەروەریا وەلات و گیانێ وەلاتیان و هێزێن پارێزەرێن ئاشتی و ئاسایشا وەلاتی. هەروەسا داوا ژ کۆمەڵگەها نێودەوڵەتی و نەتەوەیێن ئێکگرتی دکەین رۆڵێ خۆ یێ کارا بگێڕن بۆ دانانا سنوورەکێ بۆ ڤان پێشێلکاریێن بەردەوام.
هەرێما کوردستانێ هەر دەم فاکتەرێ سەقامگیریێ بوویە؛ ویست و ئیرادەیا گەلێ مە بۆ ئاشتی و ئارامیێ ژ هەمی دەستدرێژیان ب هێزترە، و ب ڤان جۆرە پەلامارێن نامەردانە ناشکێت و پاشەکشێ ناکەت.
پرسە و سەرەخۆشیێن خۆ یێن کویر ئاراستەی بنەمالێن وان شەش پێشمەرگەیێن تێکۆشەر دکەین یێن کو ئەڤڕۆ چوونە کاروانێ نەمریێ. هەروەسا سەرێ ڕێز و نەوازشێ بۆ تەڤایا شەهیدێن هێزا پێشمەرگەی و ئاسایش و هێزێن ناڤخۆیی دچەمینین یێن کو د هێرشێن ڤێ دوماهیێ دا گیانێ خۆ بەخشی، و هیڤیا چاکبوونێ بۆ برینداران دخوازین.
فراکسیۆنا پارتی دیموکراتی کوردستان
ل پەرلەمانێ کوردستانێ
٢٤ی ٣ی ٢٠٢٦