شێخان میدیا
عەباس عێراقچی، وەزیرێ دەرڤە یێ ئیرانێ د پەیاما خۆدا زێدەباری شەرمەزارکرنا ڤێ هێرشا تیرۆرستی، هیڤیا سلامەتیێ بۆ نێچیرڤان بارزانی خواست. عێراقچی ئاماژە ب دیرۆکا “فتنەگێڕی و دووبەرەکییا” ئەمریکا و ئیسرائیلێ کر د ناڤبەرا وەلاتێن دەڤەرێ و جیراناندا، و تەئکید کر کو ئەڤ جۆرە هێرشە گەلەک جاران وەک ئۆپەراسیۆنا “ئاڵایێ درەوین” بۆ چێکرنا ئالۆزییان دهێنە ئەنجامدان.
عەباس عێراقچی داخواز ژ حکوومەت و دەزگەهێن نێڤدەولەتی کر کو بەرپرسیارەتییا خۆ هەلگرن بۆ سزادانا ئەمریکا و ئیسرائیلێ بەرانبەر وێ چەندا وی ب “دەستدرێژییا درندانە” بۆ سەر ئیرانێ و هێرشێن نەیاسایی و تیرۆرستی بۆ سەر عێراقێ وەسف کری.
ئەڤ پەیاما وەزیرێ دەرڤە یێ ئیرانێ د دەمەکێدایە، کو کرە ئارمانجکرنا مالا سەرۆکێ هەرێما کوردستانێ ل پارێزگەها دهۆکێ، پێلەکا بەرفرەهـ یا شەرمەزارکرنێ ل سەر ئاستێ ناڤخۆیی و نێڤدەولەتی ل دویڤ خۆ ئینا و وەلاتێن دەڤەرێ ژی ب بایەخ ڤە بەرێ خۆ ددەنە ئەنجامێن ئەمنی و سیاسی یێن ڤان گۆهرینێن نوو د چارچۆڤێ وان گرژییێن سەربازی یێن کو دەڤەر ڤەگرتی.