شێخان میدیا
ب ناڤێ خودایێ مەزن و دلۆڤان
هەرێما کوردستانێ چ جاران نەبوویە پشکەک ژ وان کێشە و ئالۆزی و شەڕێن ل دەڤەرێ هەی، بەلێ مخابن کۆمەکا خەلکی هەنە بێی کو کەس ڕێگریێ لێ بکەت، تەرکیزا وان یا سەرەکی ئەوە کا دێ چەوا و ب چ ڕێکان دژایەتییا هەرێما کوردستانێ کەن و هەر دەم ب ناهەقی هێرشی سەر هەرێمێ و پێشمەرگەی دکەن و دبنە گەف ل سەر ژیان و سەقامگیرییا خەلکێ کوردستانێ.
د درێژاهییا سالێن بووری دا ب دەهان جاران ب زۆلم و بێی چ ئەگەر ب درۆن و مووشەکان هێرش کرینە سەر هەرێما کوردستانێ و بارەگایێن پێشمەرگەی، و خەلکێ بێگونەهـ شەهید و بریندارکرینە. ژ وێ دەما ئەڤ شەڕە دەستپێکری ژی، زێدەتر ژ 450 جاران ب مووشەک و درۆنان هێرشی سەر هەرێما کوردستانێ و بارەگایێن هێزێن پێشمەرگەیێ کوردستانێ کرینە. هەر د ڤێ ماوێ دا پێنج جاران هێرشی سەر بارەگایێ مە کرینە، بەلێ مە بێدەنگی هەلبژارتییە دا کو دلگرانی و تورەیی د ناڤ جەماوەری دا پەیدا نەبیت. دوهی ژی ل باژێڕێ دهۆکێ ب درۆن هێرشی سەر مالا سەرۆکێ هەرێمێ کرینە. بابەت نە مال یان بارەگایێ کەسەکییە، هەر جهەکێ کوردستانێ و هەر مالەکا کوردستانییان ل دەف مە بها یێ هەی.
ئەڤ جۆرە هێرشە شەڕفرۆشتنەکا ئاشکرا و زۆلمەکا مەزن و زێدەگاڤی و ناهەقیەکا مەزنە بەرانبەر هەرێما کوردستانێ و دێ بێتە فەر چارەسەریەکا جدی و ئێکلاکەر بۆ بهێتە دانان. د ڕاستی دا ئەڤە ب شەرمەزارکرن و تەلەفۆن و برووسکە و لیژنەیان چارەسەر نابن. دەسهەلاتدارێن عێراقێ دێ بێتە فەر خۆ ئێکلا بکەن؛ یان ئەوە ڕابگەهینن کو د شیانێن وان دا نینە ڕێگریێ ل وان گرووپێن ژ یاسایێ دەرکەفتی بکەن، یان ژی دێ بێتە فەر ب جدی بهێنە سەر خەتێ و پاراستنا دەولەتێ بکەن و ڕێکارێن جدی بگرنە بەر دا کو ئێدی ڕێ نەکەن هێرشێن نهڕەوا بۆ سەر هەرێما کوردستانێ بهێنە کرن.
ل ڤێرێ دوپات دکەین، گەلێ کوردستانێ ب ئیرادەکا پۆلایین بەرەڤانیێ ژ پەیاما خۆ یا ئاشتییانە و دۆزا خۆ یا ڕەوا دکەت و چو گەف و هێرش و دوژمنان نەشیایە و نەشێن وێ ئیرادەیێ بشکێنن.
مەسعوود بارزانی
29ی ئادارا 2026