د بزاڤەکا دیپلۆماسی و سیاسیدا بۆ ڤەکرنا گەروویێ هورمز، ئەو ڕێڕەوێ کەشتیڕانی یێ گرنگ یێ کو ژ بەر شەڕێ ئەمریکا و ئیسرائیل دگەل ئیرانێ تێکچووی، ئەڤرۆ پێنجشەمبی 2ێ نیسانا 2026ێ، نێزیکی 36 وەلات دێ کۆم بن.
کەیر ستارمەر، سەرۆکوەزیرێ بەریتانیا ڕاگەهاند کو کۆمبوون دێ ب شێوێ ئۆنلاین بیت ب سەرۆکایەتییا ئیڤێت کوپەر، وەزیرا دەرڤە یا بەریتانیا؛ هەلسەنگاندن بۆ هەمی کارێن دیپلۆماسی و سیاسی یێن پۆتەنسیێل دێ هێتە کرن بۆ ڤەگەڕاندنا ئازادییا گەشتکرنێ و پشتراستبوون ژ سەلامەتییا کەشتییێن گیرخواری و دەریاڤانان و دەستپێکرنا دووبارە یا هاتنوچوونا کەلوپەلێن سەرەکی.
هێرشێن ئیرانێ بۆ سەر کەشتیێن بازرگانی و گەفا هێرشێن زێدەتر، وایە ل کەشتیڕانیێ ل گەروویێ هورمز کری کو کەنداڤی ب زەریایێن جیهانێ ڤە گرێ ددەت نێزیکی راوەستانێ ببیت، و ب شێوەیەکێ کاریگەر ڕێکەکا سەرەکی یێ هاتنوچوونا نەفتا جیهانی داخستییە و بوویە ئەگەرێ بلندبوونا بەرچاڤ یا بهایێ نەفتا خاڤ.
ویلایەتێن ئێکگرتی یێن ئەمریکا پشکداری د کۆمبوونێدا ناکەت، ژبەرکو دۆناڵد ترەمپ، سەرۆکێ ئەمریکا ڕاگەهاندیە کو دابینکرنا تەناهییا ڕێڕەوێ ئاڤی ئەرکێ ئەمریکا نینە و داخواز ژ هەڤپەیمانێن ئەمریکا کریە کو نەفتا خۆ بخۆ دابین بکەن.