شێخان میدیا
ب ناڤێ خودێ مەزن و دلۆڤان
چوارێ نیسانێ رۆژەکا خەمناکە د سالنامەیا گەلێ کوردستانێ دا، یادا جینۆسایدکرنا خوشک و برایێن مە یێن فەیلییە، ئەوێن ب ئەگەرێ کوردبوونا خۆ رووبەروویێ چەوساندن و کۆمەلکوشی و زۆرداریێ بووین. کوردێن فەیلی د بن دەسهەلاتا شووم یا رژێما بەعس دا ئازار و دەربەدەریەکا زۆر دیتن و چ مافەک بۆ وان ب رەوا نەدهاتە دیتن. شەهیدکرنا هزاران گەنجان، سەندنا ناسنامەیان و دەرکرنا دەهان هزار خێزانێن کوردێن فەیلی، بەشەک بوو ژ وی پیلان و سیاسەتا نەمرۆڤانە یا کو دژی گەلێ کوردستانێ ب شێوەیەکێ رێکخستی و بەردەوام ژ لایێ رژێما پێشوو یا عێراقێ دهاتە ئەنجامدان.
د یادا چل و شەش سالیا جینۆسایدکرنا کوردێن فەیلی دا، هزاران سلاڤان بۆ گیانێ پاک یێ شەهیدێن کوردێن فەیلی و هەمی شەهیدێن کوردستانێ دهنێرین. ئەرکێ سەر ملێن دەولەتا عێراقێ یە کو قەرەبوویا ئازار و نەهامەتیێن خوشک و برایێن کوردێن فەیلی بکەت. د ڤێ یادێ دا، رۆلێ تێکۆشەر و خەباتکارێن کوردێن فەیلی د پالپشتیکرنا بزووتنەوا رزگاریخوازییا گەلێ کوردستانێ دا هەرگاڤ دێ د بیر و زەینێن مە دا بیت، و کوردێن فەیلی هەمی دەمان بەشەکێ ئازیز و رەسەنن ژ گەلێ کوردستانێ.
مەسعوود بارزانی
٤ی نیسانا ٢٠٢٦