شێخان میدیا
ئەڤرۆ ئەم یادا ب ئازار یا (٤٦) سالیا زنجیرە تاوانێن جینۆساید و دەربەدەرکرن و بێسەروشوێنکرنا خوشک و برایێن مە یێن کوردێن فەیلی دکەینەڤە. ئەو ستەملێکریێن کو د ناڤ هێرشەکا درندانە یا رژێما وێ گاڤێ یا عێراقێ دا، بتنێ ژ بەر کوردبوونا خۆ و بەرەڤانیکرنێ ژ ناسنامە و مافێن رەوا یێن گەلێ خۆ، رووبەروویێ سێدارەدان، کوشتن، گرتن، بەرزەکرن و دەرکردنێ بوون، و رەگەزنامە و سامان و مال و مولکێن وان ژێ هاتنە سەندن.
دەربەدەرکرنا سەدان هزار کوردێن فەیلی و بێسەروشوێنکرنا دەهان هزارێن دی، جینۆسایدەکا رەگەزپەرستانە یا بەعسیان بوو، کو دیرۆکەکا رەش و رابردوویەکێ تال و پڕ ژ شاشی بۆ عێراقێ ب جهـ هێلا. د ڤێ یادێ دا، ئەم دوپات دکەین کو حکومەتا فیدرال یا عێراقێ دڤێت ئەرکێ خۆ جێبەجێ بکەت و ل دویف بڕیارا دادگەها بلندا تاوانێن عێراقێ —کو ئەڤ تاوانە وەک جینۆساید ناساندیە— قەرەبوویا ماددی و مەعنەوی یا قوربانییان و زیانڤێکەفتییان بکەت و رەگەزنامە و مال و مولکێن وان بۆ بزڤرینیت.
خەبات، دلسۆزی و قوربانیدانا خوشک و برایێن کوردێن فەیلی بۆ هەرگاڤ دێ جهێ شانازیا گەلێ مە بیت. دڤێت ئەو رابردوویێ تال بۆ مە هەمییان ببیتە پەند و وانە، و بۆ پاشەرۆژەکا باشتر ل سەر بنەمایێ پێکڤەژیان و ئێکدو قبوولکرنێ ل عێراقێ مفا ژێ بهێتە وەرگرتن. بۆ ڤێ یەکێ ژی، ئەم دێ بەردەوام د بزاڤ و کۆششێن خۆ دا بین و هەر چ تشتێ پێدڤی بیت دێ هاوکار بین.
سلاو و دروود بۆ یاد و گیانێ پاک یێ شەهیدێن کوردێن فەیلی و هەمی شەهیدێن کوردستانێ. سلاو و رێز بۆ بنەمالە و کەس و کارێن وان یێن سەربەرز.