شێخان میدیا
ڕاگەهاندنەک ژ وەزارەتا پێشمەرگەی
ل شەڤا ٥ی نیسانا ٢٠٢٦ێ، جارەکا دی گروپێن تیرۆرستی یێن ژ یاسایێ دەرکەفتی، ب رێکا چوار درۆنێن بۆمبڕێژکری هێرش کرە سەر بارەگایەکێ هێزێن پێشمەرگەیێ کوردستانێ. د رۆژێن دەربازبووی ژی دا، چەندین جاران هێرشێن تیرۆرستی ل دەڤەرێن جودا جودا یێن هەرێما کوردستانێ بۆ سەر بارەگایێن پێشمەرگەی بەردەوام بووینە.
ئەڤ زنجیرە هێرشە ب ئاشکەرایى و ل بەرچاڤێن سوپا و هێزێن ئەمنی یێن عیراقێ بۆ سەر هەرێما کوردستانێ و بارەگایێن هێزێن پێشمەرگەی دهێنە کرن، کو زیانێن گیانی و ماددی یێن مەزن هەبووینە.
تا نوکە حکومەتا فیدرال، فەرماندەیێ گشتی یێ هێزێن چەکدار، فەرماندەییا ئۆپەراسیۆنێن هەڤپشک و دەزگەهێن ئەمنی یێن عیراقێ چ هەلویستێن جدی بۆ رێگریکرنێ ل ڤان هێرشێن تیرۆرستی و تێکدەرانە نەبووینە.
پێشمەرگە پشکەکە ژ سیستەمێ ئەمنی و بەرگریێ، و هەمیشە رۆلەکێ سەرەکی و کاریگەر هەبوویە د پاراستنا ئاسایشا هەرێما کوردستانێ و عیراقێ دا؛ لەوما دڤێت ئەڤ دەستدرێژیە ب زووترین دەم بهێنە راوستاندن و تاوانبار بهێنە سزادان.
ئەم ژ پێخەمەت بەرژەوەندیا هەمی خەلکێ عیراقێ و کوردستانێ و ب رەچاوکرنا ڤێ رەوشا نەخۆش، مە دان ب خۆدا گرتیە، بەلێ ئەگەر حکومەتا فیدرال هەر ب ڤی رەنگی بێ هەلویست بمینیت، ئەم دێ نەچار بین هەلویستەکێ دی وەربگرین.
وەزارەتا پێشمەرگەی
٦ی نیسانا ٢٠٢٦
