وەزارەتا ناڤخۆ یا هەرێما کوردستانێ، ئەو دەنگۆیە ڕەت کرن کو دهاتە گۆتن، وەزارەتا ناڤهاتی چەکێن ئەمریکا وەرگرتینە و ل کۆگەهێن وەزارەتێ ل هەولێرێ هەلگرتینە، هەروەسا وێ وەزارەتێ دووپاتکریە کو دێ سکالایا یاسایی ل سەر کەنال 8 و مێهڤانێن وانژی تۆمار کەن یێن کو ئەڤ تۆمەتە بەلاڤکری.
شەمبی، 2ـی ئەیارا 2026ــێ، وەزارەتا ناڤخۆ یا حکومەتا هەرێما کوردستانێ، د ڕۆهنکرنەکێدا ئاماژەکر،”د دیدارەکا کەنال 8، دا بێژەر و کادرەکێ حزبی، دانوستاندنێ دەربارەی چەکێن ئەمریکا دکەن و کادر باس ل وێ چەندێ دکەت کو ئەو چەکە داینە وەزارەتا ناڤخۆ و ل کۆگەهەکا وەزارەتێ ل هەولێرێ هاتینە هەلگرتن”.
د بەرسڤا ئەڤێ داخویانیێدا، وەزارەتا ناڤخۆ ب توندی ئەڤان گۆتنا ڕەت دکەت و ڕادگەهینیت:”سەرو بنێن ئەڤان گۆتنان د دروستکرینە و چەواشەکارینە و چ بنەمایەك بۆ نینە و دوورن ژ ڕاستییێ”.
د پشکەکا دی یا ڕۆهنکرنا وەزارەتا ناڤخۆ دا هاتیە،”دیارە ئەوێن ئەو چەکە برین، هەموو بزاڤان دکەن بۆ ڤەشارتنا ڕاستیا بابەتی، ب باسکرنا زێدەتر و بزاڤکرن بۆ ب لاڕێدابرنا ڕایا گشتی، چەواشەکارییێن زێدەتر بەلاڤ دکەن”. هەڤدەم هشیارییێ ددەت کو”ڕۆژەك دێ هێت لێپرسین دێ دگەلدا هێتە کرن”.
وەزارەتا ناڤخۆ یا هەرێما کوردستانێ دووپاتییێ ل گرتنەبەرا یا ڕێکارێن یاسایی دکەت و ڕادگەهینیت:”وەك مافێ مە، دێ سکالا یاسایی ل سەر وی کەنالی و مێهڤانێ وان تۆمار کەین، پێدڤییە ل بەرانبەر دادگەهێ بەلگەیان بۆ ئەوان چەواشەکارییا پێشکێش بکەین، ئەگەر نە پێدڤیە باجا بەلاڤکرنا تۆمەتێن دروستکری بدەن”.