نێچیرڤان بارزانی، سه‌رۆكێ هه‌رێما كوردستانێ ئه‌ڤرۆ د سالڕۆژا شه‌هیدبوونا له‌یلا قاسم و هه‌ڤالێن وێ دا په‌یامه‌ك به‌لاڤكر و ڕاگه‌هاند، لەيلا قاسم ب تنێ سمبۆلەکا نەتەوەیی نینە، بەلکو مەشخەلا هشیاری و پێشەنگییا ئافرەتێن کوردستانێ بوو دخەبات و قۆربانیدانێدا، وێ ب خۆڕاگرییا خۆ یا بێ وێنە د زیندانێدا و ل بەردەم سێدارێ، سەلماند کو ئافره‌تا کورد خۆدان ئیرادەیەکا پۆلایینە و بۆ ئازادییا گەلێ خۆ یا ئامادەیە.

دیار ژی كر، خەباتا لەيلا قاسمێ بوویە نموونەیا باوەری ب خۆبوونێ بۆ هەموو نڤشێن پشتی خۆ، هەر ژ باژێرێ خانەقینێ هه‌تا زانکۆیا بەغدا و هه‌تا دووماهی چرکەیا ژیانا وێ د زیندانێن ڕژێما بەعسدا، وەك وانەکا خۆڕاگر و نیشتمانپەروەر د وژدانا کورد و کوردستانییاندا دێ هه‌ر زیندی مینیت.