شێخان میدیا
د جیهانا مۆدێرنا ئەڤڕۆ دا، مێز و کورسی جهێ سۆفرا سەر عەردی گرتییە، بەلێ ڤەکۆلینێن نوی و نۆشدارێن تایبەتمەند د بوارێ هەرسێ و گەهان دا ئاماژێ ب وێ چەندێ دکەن کو ڤەگەراندن بۆ سەر عەردی چەندین مفاێن باش هەنە کو رەنگە مە هزرا وان نەکربیت.
ل دویف بابەتەکێ مالپەرێ “koreatimes”، شارەزایێن ساخلەمیێ باس ل وێ چەندێ دکەن کو نانخوارن ل سەر عەردی ئێکە ژ باشترین راهێنانێن رۆژانە کو تو دشێی بۆ لەشێ خۆ ئەنجام بدەی.
دیارترین مفایێن ساخلەمیێ یێن نانخوارنێ ل سەر عەردی:
١. باشترکرنا کریارا هەرسێ: دەما تو ب ئارامی ل سەر عەردی دڕوینی، مێشک ئاماژەیێن ئارامبوونێ بۆ کۆئەندامێ هەرسێ دهنێریت، هەروەسا ماسولکێن زکی چالاک دکەت و هاریکارییا مەعیدێ دکەت کو ب ساناهی خوارنێ هەرس بکەت.
٢. زوو هەستکرن ب تێربوونێ: روینشتن ل سەر عەردی هاریکارییا دەماران دکەت کو پەیاما تێربوونێ ب لەزتر بگەهیننە مێشکی. ل سەر کورسیێ فشارەک دکەڤیتە سەر مەعیدێ و مرۆڤ درەنگتر هەست ب تێربوونێ دکەت، بەلێ ل سەر عەردی ب هویری هەست ب ئاستێ تێربوونێ دهێتەکرن.
٣. پاراستنا نەرماتیا گەهان: روینشتن ب شێوازێ دیوانکی راهێنانەکا سروشتی یە بۆ پاراستنا نەرماتیا گەهان، ماسولکە، پاژنێن پێیان. رێگریێ ل رەقبوونا گەهان دکەت ئەوا ژ ئەگەرێ زێدە روینشتنێ ل سەر کورسیێ پەیدا دبیت.
٤. رێکخستنا پشتێ و ستوینا فەقەران: بۆ وێ چەندێ تو ل سەر عەردی ب هەڤسەنگی روینی، تو نەچاری پشتا خۆ راست بکەی و ملێن خۆ ببەی بۆ پاش، ئەڤ چەندە رێگریێ ل چەماندنا پشتێ و ئازارێن درێژخایێن یێن بڕبڕا پشتێ دکەت.
٥. ئارامکرنا مێشکی: د زانستێ یوگادا، ئەڤ جۆرە روینشتنە ب “Sukhasana” دهێتە نیاسین، کو هاریکارە بۆ ئارامکرنا مێشکی و کێمکرنا دلتەنگی و فشارێ د دەمێ نانخوارنێ دا.
تێبینی: هەرچەندە نانخوارن ل سەر عەردی گەلەک یا ساخلەمە، بەلێ بۆ ئەو کەسێن کێشەیا سەوەفانا چوکان هەین یان نشتەرگەریێن گەهان کرین، باشترە مێز و کورسیێ بکار بینن داکو فشارەکا زێدە نەکەڤیتە سەر چۆکێن وان.