شێخان میدیا
ئەگەر ئەم هزرا خۆ د ساڵ و دەمێن بۆرویدا بکەین و چاڤخشاندنەکێ بۆ ڕەوشا وی دەمی بکەین، دێ هێتە بەرچاڤێن مە کو خێزان هەمی ل ژێر ئێک بان بوون، یان دبیت بان ژی نەبیت و پەنا بۆ خیڤەتێ بربیت. ل وی دەمی، هەر ئێکێ خیڤەتەک هەبا، هەر وەکی وێ چەندێ بوو کو نوکە ترۆمبێلەک یان خانیەکێ گرانبەها هەبیت! یان هەر کەسێ هەسپەک یان گایەک هەبا، وەک کو دونیا هەمی یا وی بیت و خۆ ژ هەمیا بەختەوەرتر ددیت.
و هۆسا، دگەل سەختیا ژیانێ و بۆرینا وێ ڕەوشێ، هێشتا دبێژن، دلێ مە یێ خۆش بوو، ژبەرکو ئەو مژویلی ڕۆژانێن ژیانا خۆ بوون و دەمێ هندێ نەبوو هزرا مایتێکرنا ژیانا کەسانێن دیدا بکەن.
ئەگەر ئەم دیسان هزربکەین و تەماشە بکەین، دێ بینین خەونێن خەلکی یێن بووینە ڕاستی. ئەو تشتێ بتنێ وان د خەیالێن خۆدا ددەستنیشانکر، ئەڤرۆ یێ ل بەردەستێ وان؛ هەسپ بوونە ترۆمبێل و خیڤەت بوونە خانی. (ئەوێ نوکە هێشتا ل ژێر خیڤەتێ بیت یان کار ب هەسپی بکەت، دێ بێژنێ: فلان کەسێ خودانێ هەسپی)
ئانکو وەک دلپێڤەمانەک! ئەرێ ما ئەو هەسپ نە ترۆمبێلا سەردەمێ خۆ بوو؟
ل شوینا خیڤەتان، کاش، سیرامیک و مەڕمەڕ هاتن، و ئێدی خەلک گەهشتە قۆناغەکێ کو د ناڤا جوانیێدا دژین. بەلێ دگەل ڤێ جوانیێ، ئەرێ خۆشی هەیە؟
پشتی چاڤێن خەلکی ب جوانیێ ڕووهن بووین، و ل جهێ هەسپ و گایان بووینە ترۆمبێلێن پێشکەفتی، هێشتا د نەڕازیبوونێدا دژین، ژبەرکو وان جوانیەکا پتر، خۆشیەکا پتر و مالەکا پتر دڤێت. ئەو تشتێ هەی، خۆشیێ ژێ نابینن، بەلکو بەردەوام چاڤ ل خۆشیێن خەلکی نە!
و ئاها هۆسا:
خانیێ تە یێ نوکە،
ترۆمبێلا تە یا نوکە،
جلوبەرگێن تە یێن نوکە،
ئەوێن تو خۆ پێ مەزن دبینی…
ڕۆژەک ژ ڕۆژان دێ بنە بچووکترین تشتێن تە!
ژیان د زڤرۆکەکا بەردەوام دایە:
کەڤنی نوو دکەت،
نووی کەڤن دکەت،
پاشکەفتی پێش دئێخیت،
و پێشکەفتی پاش دئێخیت.