ڕاگەهاندنەک ژ مەکتەبا سیاسی یا پارتی دیموکراتی کوردستان
هاوەڵاتیێن خۆشتڤی لایەنێن سیاسی یێن ڕێزدار یێن بەشدار د پەرلەمانێ کوردستانێ دا هەر ژ پشتی دوماهیک هاتنا هەڵبژارتنێن خولا شەشێ یا پەرلەمانێ کوردستانێ و ڕاگەهاندنا ئەنجامێن وێ، ژ دیدەگەها هەستکرن ب بەرپرسیارەتیێ و غەمخۆریێ بۆ بارودۆخێ هەرێمێ، مە پێنگاڤێن خۆ دەستپێکرن بۆ کاراکرنەڤەیا دامەزراوەیێن شەرعی یێن هەرێمێ لدویف یاسایا بەرکار.
بەلێ سەرەڕای پەیام و پەیوەندی و بزاڤێن بەردەوام یێن سەرۆک مەسعود بارزانی و پارتییا مە بۆ دانوستاندن و لێکتێگەهشتن و نێزیکبوون ژ چارەسەرا وان ئاریشەیێن کو بووینە ڕێگر ل هەمبەر کاراکرنەڤەیا پەرلەمانی و هەڵبژارتنا سەرۆکایەتیا هەرێمێ و پێکئینانا کابینەیا دەهێ، ب ڕێیا پێشکێشکرنا چەندین سیناریۆ و ڕێگەچارەیێن گونجای بۆ دەربازبوون ژ وێ چەقبەستووییا ڕووبەڕووی پرۆسەیا سیاسی یا هەرێمێ بووی، چ ب کۆبوونەوەیێن دووقۆلی و چەندقۆلی، دەستپێشخەری، پێکئینانا شاندا، پەیام و سەرەدانان، بەلێ مخابن بەرسڤدان و هەڵویستێن ئەرێنی یێن پێدڤی نەهاتنە دیتن.
بارودۆخێ دەڤەرێ ب گشتی و یێ هەرێما کوردستانێ ب تایبەتی، بەرپرسیارەتیەکا نەتەوەیی، نیشتمانی و ئەخلاقی دکەتە سەر ملێن مە بۆ هەرچی زووتر دۆزینا ڕێگەچارەیەکێ بۆ دەربازبوون ژ ڤی دۆخێ نەخوازیار یێ نوکە، کو ژبلی زیانگەهاندنێ ب هەرێمێ و ئەزموون و دەستکەفتێن مە، بۆ چ لایەنان چو مفا تێدا نینە.
لەورا، دەمێ کۆبوونەوە و شاند و سەرەدان و پەیام، هەروەسا بزاڤێن مە بۆ ڤەگوهاستنا لێگەریان و گەنگەشەیا ئاریشەیان ژ سەر جاددە و ڕاگەهاندنان بۆ سەر مێزا دانوستاندنێ بێ ئەنجام دبن، فەرموون لایەنێن بەشدار د پەرلەمانی دا، چ ئەوێن کورسیێن وان زۆرن و چ ئەوێن کورسیێن کێمتر هەیین، وەرن پەرلەمانی کارا بکەینەڤە و پەرلەمانتار د ناڤ هۆلا پەرلەمانی دا بەرپرس بن ژ ئەنجامدانا دانوستاندنەکا بەرهەمدار و دۆزینا چارەسەریا گونجای، و ئەم هەموو لایەن پابەندی وێ ڕێگەچارەیا بڕیار ل سەر دای یا پەرلەمانێ کوردستانێ بین.
مەکتەبا سیاسی یا > پارتی دیموکراتی کوردستان > ٢٧ێ حوزەیرانا ٢٠٢٦