پەیاما سەرەخۆشیێ ژ سەرۆک بارزانی بۆ کۆچکرنا پێشمەرگەیێ دێرین (کازم شانەدەری)
سەرۆک بارزانی پەیامەکا هاوخەمیێ بۆ کۆچباڕکرنا کازم شانەدەری، پێشمەرگەیێ کۆمارا کوردستانێ و ئێک ژ هەڤالێن بارزانیێ نەمر ل ئێکەتیا سۆڤیەت و پێشمەرگەیێ هەردوو شۆرەشێن ئەیلوول و گولانێ بەڵاڤکر.
سەرۆک بارزانی بۆ کۆچباڕکرنا کازم شانەدەری ڕادەگەهینیت: قوتابی و شۆندۆبەکەرێ ڕێبازا بارزانی، ژ وان قارەمانا بوو یێن کو هەمی کێلیشکێن ژیانا خۆ بۆ دۆزا ڕەوا یا گەلێ کوردستانێ تەرخانکری.
سەرۆک بارزانی هەر ل سەر ڤێ چەندێ سەرەخۆشیێ ل تەمامیا بنەماڵە، کەسوکار و ناسیاڕێن کازم شانەدەری دکەت و د ڤێ بۆنەیا خەمناک دا خۆ ب هەڤپشکێ خەما وان دزانیت.
دەقێ پەیاما هاوخەمیێ یا سەرۆک بارزانی:
ب ناڤێ خودێ مەزن و دلۆڤان
ب داخەکا مەزن ڤە نووچەیێ کۆچباڕکرنا پێشمەرگەیێ کۆمارا کوردستانێ ل مەهابادێ و ئێک ژ هەڤالێن بارزانیێ نەمر ل ئێکەتیا سۆڤیەت و پێشمەرگەیێ هەردوو شۆرەشێن ئەیلوول و گولانێ (کازم شانەدەری) گەهشتە مە.
کازم شانەدەری قوتابی و شۆندۆبەکەرێ ڕێبازا بارزانی، ژ وان قارەمانا بوو یێن کو هەمی کێلیشکێن ژیانا خۆ بۆ دۆزا ڕەوا یا گەلێ کوردستانێ تەرخانکری. ژیان، کۆلنەدان و بەردەوامیا وی د خەباتێ دا وانەکا پر بهایە بۆ هەمی تێکۆشەر و نیشتیمانپەروەرێن کوردستانێ.
پرسە و سەرەخۆشیێن خۆ ئاراستەی بنەماڵە، کەسوکار و ناسیاڕێن خودێ لێ خۆشبوو کازم شانەدەری و هەمی پێشمەرگە، خەباتکار و نیشتیمانپەروەرێن کوردستانێ دکەم و خۆ ب هەڤپشکێ خەما وان دزانم.
ژ خودایێ مەزن داواکارم ڕۆحا خودێ لێ خۆشبوو کازم شانەدەری ب بەهەشتا بەرین شاد بکەت و سەبر و ئارامیێ ب بەخشیتە هەمی لایەکی.