شێخان میدیا
وەزارەتا ئەوقاف و كاروبارێن ئایینی یا حوكمەتا هەرێما كوردستانێ بڕیار دا كو ماوێ دانا پرسێ بتنێ ئێك ڕۆژ بیت و جەختێ ل سەر وێ چەندێ دكەت كو ب چ ڕەنگان ڕێ پێدای نینە ژ وێ ماوێ درێژتر بیت، ژبۆ ڤێ مەرەمێ ژی لیژنەیەكە بسپۆر چەند ڕێنماییێن نوو ددەرئێخیت.
ئەڤرۆ ئێكشەمبی، پشتیوان سادق، وەزیرێ ئەوقاف و كاروبارێن ئایینی، ب ئامادەبوونا زەینەدین مەولود، برێكارێ وەزارەتێ، دگەل پشكەك ژ كارگێرێن هۆلێن بۆنە و پرسەیان ل هەولێرێ كۆمبوو. د كۆمبوونێ دا جەخت ل سەر پابەندبوونا هەموو ئالیان ب ڕێنماییێن تایبەت ب پرسە و بۆنەیێن ئایینی ڤە هاتە كرن، ژبۆ خزمەتا گشتی و ڕێكخستنا ڤی بیاڤی.
وەزیرێ ئەوقاف ئاماژە ب وێ چەندێ كر، پێدڤیە پابەندبوونا تەمام هەبیت ب وێ چەندێ یا كو ڕۆژا پرسێ بتنێ ئێك ڕۆژە و نابیت ژ وێ ماوێ دەرباز بیت. بڕیارە ژی لیژنەیەكە بسپۆر ب سەرپەرشتیا وەزارەتێ، چەند خالێن ڕێنماییێن نوو د بەرژەوەندیا گشتی دا دەرئێخیت، ب مەرەما ئاسانكاریا بۆ كەسوكارێن مرۆڤێ مرین و كێمكرنا بارێ گران ل سەر شانێن وان، كو بڕیارە ل سەرجەم هۆلێن پرسێ وەك خو بجهـ بینن.