شێخان میدیا
دەما ل گولیێن گەنمی تەماشە بكەین، هندەك گولیێن وی سەرێ وان یێ بلندە و هندەكا سەرێ وان یی نزمە، و هەردەم ئەڤ گولیێن سەرێ وان بلند د ڤاڵانە و جاڤێن هەمیا بۆ دهێنە كێشان ژبەر بلنداهیا وی، و هەردەم ئەڤ گولیێن تژی و بەرهەمدار ژبەر هەبونا بەرهەمی و گرانی و سەنگا وی بەرهەمی، سەرێ وان نزم دبیت، و ڕەنگە ئێدی لژێر پیێت خەلكی بكەڤیت، و بەرهەمێ وێ بیتە ئەگەرێ ژناڤبرنا وی، لەوما دەما سەرێت ڤاڵا شانازیێێ ب ئەوێ بلنداهیێ دكەن یا ژ ڤاڵاتیا خۆ وەرگرتی و سەرێن تژی شەرمێ ژ خۆ بكەن كو بەرهەمێ وان ڕێكێ نا دەنێ سەرێن خۆ بلند بكەن، و ئەوژی داخازا بلنداهیێ بكەن، ئێدی لڤێرێ چ ڕامان ژبۆ مانا بلنداهیێێ نامینن، و ئێدی گوڕستانەك دێ ل ناڤا كومەلگەهێ هێتە دروستكرن، سەرێن ب بەرهەم تێدا هێنە بن ئاخكرن و بن ئاڤكرن و سەرێن كو ب ڤاڵاتیێ د بلند دێ تێدا هێنە پیرۆزكرن، هەر وەك نڤیسەرێ مەزن تەلعەت تاهیر دگوتنەكا خودا دبێژیت(( ئەگەر تە دڤێت سەر ئاڤ بكەڤی، یان دڤێت ببیە تەڕم یانژی ببیە فلینە)) داكو سڤك ببی و لسەر ئاڤێ بكەڤی، لەوما هوسا هەردەم كەسێن زیندی ب زانینا خۆ دمرن بەری مرنا وان بهێت، و ناژین د ساخیا خودا ، ئەرێ ئاها هوسایە وەك بەختیار عەلی دبێژیت ( گورستان پڕە ژ وان كەسێن زیندی ، و ئەڤ ژیان پڕە ژ كەسێن مری)) ئەرێ ئەم حەز ژ ڤاڵاتیێ دكەین و بتنێ بلنداهیێێ د پەرێسین؟؟ ئەگەر بێژین نەخێر! ژیوار و رەنگڤەدانا وی بەلێ یە، و ئەگەر بێژێن بەلێ، واتە هەردەما ئەم ڤێ ڕتما ژیانێ دبەردەوامبین، دێ بەردەوام ئەڤ جهە بیتە گورستانا زیندیا و مری ژی تێدا ب زیندی هێنە دیتن و پیرۆزكرن.