شێخان میدیا
ڕاگەهاندن ستوونا سەرەکی یا هۆشیاری و گەیاندنا دەنگێ خەلکی یە ل قەزا شێخان ئەڤ ئەرکە وەک دڵسۆزیەکا مەزن ل سەر ملێن ڕادیۆیا شێخان بوو، کو شیایە ببیتە ئێکەمین و دیارترین دەزگەهێ ڕاگەهاندنێ ل دەڤەرێ و د دیرۆکا ڕاگەهاندنا دەڤەرا مە دا، هندەک ناڤ و دەزگەهـ هەنە کو نابنە کەنالەک بۆ گەهاندنا دەنگوباسان بەڵکو دبنە پشکەک ژ ناسنامە و ژیانا ڕۆژانە یا خەلکی، ڕادیۆیا شێخان وەک ئێکەم دەزگەهێ ڕاگەهاندنێ ل قەزا شێخان شیایە د ماوەیەکێ کورت دا ببیتە منبەرەکا ئازاد، دەنگەکێ ڕاستگۆ و ڕەنگەکێ جوان یێ پێکڤەژیانێ و ڕەسەنایەتیا ڤێ دەڤەرێ.
ئەڤرۆ کو دوو سال ب سەر سالپەیدابوون و دامەزراندنا ڤێ ڕادیۆیێ دا دەرباز دبن، دەمەکە بۆ هەلسەنگاندنا کاروانەکێ پڕی سەرفەرازی د ڤان دوو سالان دا، ڕادیۆیا شێخان نە تنێ دەنگەک بوو د ناڤ شەپۆلان دا بەڵکو پرەک بوو بۆ گەهاندنا داخواز و ئاریشێن خەلکێ دەڤەرێ بۆ بەرپرس و لایەنێن پەیوەندیدار رادیو شیا ب پرۆگرامێن خۆ یێن جۆراوجۆر یێن چاندی، جڤاکی، و ڕەوشەنبیری، خزمەتەکا مەزن پێشکێشی هەمی چین و توێژێن جڤاکی بکەت.
ئێک ژ خالێن هەرە دیار و سەرکەفتیێن ڕادیۆیا شێخان د ماوێ ڤان دوو سالان دا، دابینکرنا سەکۆیەكا دڵسۆز بوو بۆ خزمەتکرنا ڕێکخراوێن جەماوەری و پیشەیی ئەڤ دەزگەهە شیایە ببیتە دەنگێ ڕاستەقینێ تەخێن گرنگ یێن جڤاکی وەک (قوتابی و لاو – ئافرەتان)، و ب ڕێیا بەرنامە و ڕووپەلێن خۆ یێن تایبەت دەرگەهـ بۆ شیان و داخوازیێن وان ڤەکریە و پشتەڤانیەکا بەردەوام ل ماف و چالاکیێن وان کریە.
سەرەڕای ڤێ چەندێ، ڕادیۆیا شێخان وەک هەڤپەیمانەکێ میدیایی یێ بهێز بۆ هەمی کۆمەڵە، سەندیکا و ئێکەتیێن پیشەیی ل دەڤەرێ کار کریە، و چالاکی و پێشنیارێن وان یێن جۆراوجۆر ب شێوەیەکێ پیشەیی ڕووماڵ کرینە. ئەڤ پێشەنگایەتیا ڕادیۆیێ نیشا ددەت کو ئەو بتنێ دەزگەهەکێ نووچەیی نینە بەڵکو پشکەکا زیندی و کارا یە ژ بونیادێ جڤاکی و ڕێکخراوەیی یێ قەزا شێخان، کو ئارمانجا وێ یا سەرەکی پێشڤەبرنا ئاستێ ڕۆشنبیری و پیشەیی یە ل دەڤەرێ.
سەرکەفتنا ڕادیۆیا شێخان د ڤێ ماوێ کورت دا بەرهەمێ ماندووبوون و شەڤنخونیا ستاڤەکێ دلسۆز و داهێنەرە کو ب چەکێ پیشەییبوونێ و ئەمانەتا ڕاگەهاندنێ کار کرییە. وان شیایە باوەریەکا بهێز ل دەڤ وەرگر و گوهدارێن خۆ دروست بکەن، و ئەڤ باوەرییە ژی مەزنترین سەرمایەیە بۆ هەر دەزگەهەکێ ڕاگەهاندنێ یێ سەرکەفتی.
ب هەلکەفتا بۆنەیا دوو سالبوونا دامەزراندنا ڕادیۆیا شێخان :
پیرۆزباهی ل ڕێڤەبەر و ستاڤ و پێشکێشکار و تەڤەیا کارمەندێن هێژا یێن ڕادیۆیا شێخان دکەم.
د ڤێ ڕۆژا پڕی مانا دا، دەستخۆشیێ ل شەڤنخونی و ماندیبوونا هێژایان دکەم کو د ڤان دوو سالێن دەربازبوویی دا شیاین ببنە سەروەرێ دەنگ و ڕەنگێ خەلکێ قەزا شێخان و بەهدینان و کوردستانێ. ڕادیۆیا شێخان سەلماند کو ڕاگەهاندن نامەیەکا پیرۆزە بۆ خزمەتکرنا مرۆڤایەتیێ و ئاڤاکرنا جڤاکی.
هیڤیا بەردەوامی و گەشەکرن و سەرکەفتنێن مەزنتر بۆ کاروانێ هەوە یێ ڕاگەهاندنێ دخوازم. هەر شاد و سەرفەراز بن و دەنگێ هەوە بەردەوام زەلال و بلند بیت.
سالڤەگەرا ڕادیۆیا شێخان پیرۆز بیت!