شێخان میدیا
رادیویا شێخان – دوو سالێن خزمەت و شانازیێ
دەنگێ زەلالێ شێخانێ
ب هەلکەفتا دووەمین سالڤەگەڕا دامەزراندنا ئێکەم دەزگەهێ ڕاگەهاندنێ ل دەڤەرا شێخان، گەرمترین پیروزباهیان ئاراستەی تەڤایا خەلکێ خۆشتڤی یێ شێخان و دەستەیا کارگێڕی و گشت کارمەند و بێژەرێن وێ یێن خودان شیان دکەین.
رادیویا شێخان خەون و هیڤیەکا دێرین یا خەلکێ شێخان بوو، خەونا وێ چەندێ کو رۆژەکێ دەنگەکێ زەلال و راستەقینە یێ کور و کچێن ڤێ دەڤەرێ بهێتە گوهێ مە. ئەو خەون ب ماندیبوون و خەباتا دوو سالان کرە راستی.
ب راستی ژی د ڤان دوو سالان دا رادیویا شێخان سەلماند کو نە بتنێ رادیویەکە، بەلکو ستێرەکەکا گەشە ل ئاسمانێ ڕاگەهاندنا کوردستانێ. بوویە دەنگێ پێکهاتەیێن کوردستانێ و ناسناما شێخانێ، شێخانا خودان ئیرادە و هونەر، شێخانا زانا و رەوشەنبیران، شێخانا کەسێن بەهرەمەند، شێخانا جهێن کلتوری و دیرۆکی، شێخانا پێکڤەژیانێ شێخانا عەگید و میرخاسان و کوردپەروەران و مریدێن رێبازا بارزانی دایە ناسین.
ب بەرنامە و دیدارێن خۆ یێن تایبەت و رۆژانە، وەکر کو خەلک ب هیڤی و حەزەکا مەزن چاڤەرێی گوهداریکرنا وی دەنگێ زەلال و خوەش بن. ب ساخکرنا هەلکەفت و بیرهاتن و چەژنێن نەتەوی و ئاینی، ب بریکە و پرسیار و بەرسڤان، ئاستێ رەوشەنبیری و زانینا خەلکێ مە بلندتر کر.
ئەو رۆژا رادیویا شێخان بۆ ئێکەم جار دەنگێ خۆ گەهاندە مالێن مە، رۆژەکا گەش بوو د ناڤ جەرگێ شێخانێ دا. دەرگەهەک بوو بۆ رەوشەنبیر و نڤیسەر و گشت کەسێن خودان شیان کو بشێن هزر و بۆچوونێن خۆ بگەهیننە هەمی جیهانێ
ئەم شانازیێ ب رێڤەبەر و کارمەند و بێژەرێن وێ یێن خۆشەویست و خودان شیان دبەین، ئەو هەژی وێ چەندێ نە کو ئەم خۆ پێ سەربلند ببینین.
لەوا وەک بیسەرەکی رادیویا شێخان،ب ڤێ هەلکەفتا پیروز سەرفراز و سەر بلندین ب هەبوونا رادیویەکی ب ناڤێ شێخانێ کو ب ڤی شێوەیێ جوان خزمەتێ دکەت. ئەڤ رۆژە ل هەمی لایەک پیروز بیت.
هیڤیدارین ئەڤە دەستپێکەک بیت بۆ پێنگاڤێن مەزنتر، رۆژەک بهێت شێخان ببیتە خودان کەنالێن تەلەفزیونی یێن مەزن، چونکی شێخان هەژی وێ چەندێ یە و دەولەمەندە ب کەسایەتیێن ژیر و زانا، و ئەگەر دەلیڤە بۆ بهێتە رەخساندن دێ خزمەتا زێدەتر کەت.
پیروز بیتە ٢ سالیا رادیویا شێخان… هەر بەردەوام و گەش بیت
رۆژنامەڤان
مەهدی حەسەن مراد