ئەڤرۆ پێنجشەمبی، 30ـی تەمموزا 2026، کوێستان محەمەد، وەزیرا کار و کاروبارێن جڤاکی یا حکومەتا هەرێما کوردستانێ راگەهاند، ب بڕیارا سەرۆکوەزیران مەسرور بارزانی مووچەیێ خانەنشینییا کرێکارێن کەرتێ تایبەت بوو 500 هزار دینار.
جڤاتا وەزیرێن هەرێما کوردستانێ بڕیارەکا فەرمی دەرێخست بۆ دیاریکرنا کێمترین مووچەیێ هەیڤانە یێ خانەنشینیێ بۆ کرێکارێن کەرتێ تایبەت ب کوژمێ 500 هزار دیناران، ب مەرەما وەک هەڤکرنا وی دگەل کێمترین مووچەیێ خانەنشینێن کەرتێ گشتی.
ل دویڤ بڕیارا ژمارە (297) یا جڤاتا وەزیرێن هەرێما کوردستانێ کو ل 24ـی حوزەیرانا 2026 ب ئیمزایا مەسرور بارزانی، سەرۆکێ جڤاتا وەزیران دەرکەفتیە و ئاماژێ ب کۆمبوونا ژمارە (171) یا جڤاتا وەزیران دکەت، ب تێکرایا دەنگان چەند بڕیارەک دەربارەی مووچەیێ خانەنشینیا کرێکاران پەسەند کرینە.
– پەسەندکرنا پێشنیارا وەزارەتا کار و کاروبارێن جڤاکی بۆ دیاریکرنا کێمترین مووچەیێ هەیڤانە یێ خانەنشینیا کرێکارێن کەرتێ تایبەت ب کوژمێ (500,000) پێنج سەد هزار دیناران.
– راسپاردنا هەردوو وەزارەتێن (کار و کاروبارێن جڤاکی) و (دارایی و ئابووری) بۆ دەرێخستنا رێنمایێن پێدڤی ب مەرەما ساناهیکرنێ د جهئینانا بڕیارێ دا.
– ئەڤ بڕیارە ژ لایێ وەزارەت و لایەنێن پەیوەندیدار ڤە دێ هێتە جهئینان و د رۆژنامەیا فەرمی یا (وەقایعی کوردستان) دا دێ هێتە بەلاڤکرن.
ئەڤ بڕیارا حکومەتا هەرێما کوردستانێ ب پشتەڤانیا یاسایا جڤاتا وەزیران (ژمارە 3 یا سالا 1992 یا هەموارکری)، و بۆ جهئینانا یاسایا خانەنشینیا ئێکگرتی (ژمارە 9 یا سالا 2014) دەرکەفتیە و تێدا کێمترین مووچەیێ خانەنشینیا کەرتێ گشتی ب 500 هزار دیناران دەستنیشان کربوو، دگەل پشتەڤانیا یاسایا خانەنشینی و دەستەبەریا جڤاکیا کرێکاران (ژمارە 39 یا سالا 1971 یا هەموارکری) ل هەرێما کوردستانێ..