شێخان میدیا
پشتی چل رۆژێن چلێ هاڤینێ ب دویماهی دهێن، رۆژا دویماهیێ دبیتە جەژن. ئەڤ جەژنە ئێك ژ وان جەژنێن رێورەسمێن وێ ل پەرستگەها لالش دهێنە گێڕان.
هەر بۆ زانین، چەندین جەژن ل پەرستگەها لالش دهێنە گێڕان وەك:
• جەژنا چلێ زڤستانێ
• جەژنا چلێ هاڤینێ
• جەژنا جەماییێ
جەژنا چلێ هاڤینێ ئێك ژ وان جەژنانە كو ل رۆژا دویماهیێ ژ چلەیێ دبیتە جەژن و پێ دهێتە گوتن جەژنا چلێ هاڤینێ.
ئختیارێ مەرگەهێ و جڤاتا وی و دەروێش و شكەستی و زانایێن ئایینی و هەر ئێزدیەكێ بڤێت، ڤان چل رۆژا برۆژی دبن، پێ دهێتە گوتن چلەگر. و پێدڤیە ئەوێن رۆژیێ بگرن، ل هێڤارا رۆژیا ئێكێ قەستا پەرستگەها لالش بكەن و هندەك ئاخ ژ چلەخانێ دگەل خۆ هەلبگرن.
دەمێ چلێ هاڤینێ:
چلێ هاڤینێ ژ 11ی حوزەیرانێ هەتا 20ی تیرمەهێ ب هژمارا رۆژهەلاتی یە و 20ی تیرمەهێ دبیتە جەژن، ئانكو ژ 24ی حوزەیرانێ دەست پێ دكت هەتا 2ی تەباخێ ب هژمارا زایینی، كو دبنە 40 رۆژ. وەكی دیار، ئەڤ جەژن ب دەمی ڤە یا گرێدایە، د ڤان رۆژێن گەرم و درێژ دا زەلامێن ئۆلی و هەر ئێزدیەكێ بڤێت چل رۆژان ژبۆ خودێ دگرت.
ئەڤ جەژن بۆ ماوێ سێ رۆژان دهێتە گێڕان ژ 31ی تیرمەهێ هەتا 2ی تەباخێ ب هژمارا زایینی، و هەر ئێزدیەكێ بڤێت قەستا پەرستگەها لالشا نوورانی دكت، لێ سەردەری و دیندار پێدڤیە شەڤەكێ بەری گێڕانا رێورەسمان ئامادەبن.
رێورەسم ب ڤی ئاوایی دهێنە گێڕان:
1. ئێزدی قەستا پەرستگەها پیرۆزا لالش دكن، دڤێت ژ سەر پرا سیلاتێ دەرباز ببیت و بچیتە سەر حەودا كانیا سپی و دەست و چاڤێن خۆ پێ پاقژ بكت.
2. هەر ئێزدیەكێ بچیتە لالشا نوورانی، دڤێت سەرەدانا كانیا سپی و دەریێ قاپیی و زەمزەمێ و سندروكا شێخادی و بەرێ شڤاكێ و نیشانگەها شێخ فەخر و ئختیارێ مەرگەهێ و مەزارگەهێن شێشمس و شێخ و پیرێن خۆ بكەت و ل مەزار و نیشانگەهێن خاس زیارەتێ ببەت.
3. ل هەموو هێڤاران سەما دهێتە كێشان و چرایێن ئاقد و نیشانگەهێن خاس دهێنە ڤێخستن و هیڤی و دوعا دهێنە كرن.
4- ل هەموو رۆژان، سپێدەهیا پشتی بەیتا سپێدێ و هێڤارا بەری بەیتا هێڤاری رێورەسمێن قەنتارێ دهێنە گێڕان
5- هەر كەس خۆ و كەس و كارێن خۆ ب ئاڤا زەمزەمێ سەلا دكت.
6- ئەو كەسێن نەمۆركرین، ب ئاڤا كانیا سپی دهێنە مۆركرن.
7- هەروەسا هەموو هێڤاران قەول و بەیت و قەسیدە دهێنە رێزكرن و دەف و شڤال لێدخن،
8- گۆڤەندا بەر دەرێ كانیێ دهێتە گێڕان.
9- سەردەریێن خاس سماتێ چێدكن،
10- ل رۆژا دویماهیێ ژ جەژنێ تاووس دهێتە جوانكرن
11-ل گوندان هەر مالەك سەربرەكێ سەرژێ دكت.
هەر بۆ زانین،چلەگرێ چلێ زڤستانێ ژ 24ی كانوونا ئێكێ دەست پێ بكەت هەتا 2ی سباتێ ب هژمارا زایینی، دیسا ل رۆژا 40ێ دبیتە جەژن. رێورەسمێن وێ جەژنێ هەر وەكی یێن جەژنا چلێ هاڤینێ نە و ل پەرستگەها لالش دهێنە گیران :
ئەڤە دگەل نڤیسینا مەدا چەند بەیتێن ژ ئەدەبێ ئایینێ ئێزدیان دیار د کەت دڤێت رێز ل چلەگرا بهیتە گرتن :
مەلەك فەخرەدین دەنگ هلتینە
هنجیێ خاترا من تێ ببینە
دلێ چلەگرا نا ئێشینە
چلەگر برۆژینە
فەرزێن خۆ بجهـ تینن
ئەو جندیێن سلتێنە
ب شەڤ رۆژ برۆژینە
ئەوان فتار نینە
ئەو جندیێن سولتان ئێزینە
ژێدەر:
1. پەرتووكێن پەروەردا ئێزدیاتیێ.
2. مامۆستایێ ئایینی پیر سەعید پیر بیبو
٣- پیر خەلات ئەلیاس زانایێ ئاینی