شێخان میدیا
ئهڤرۆ ب خەم و ئازارەکە قووڵ، یادا دوازدە سالیا تاوانا جینۆساید و کۆمەڵکوژیا هاووڵاتییێن مە یێن ئێزدی دکەینەڤە. د ڤێ یادا بەئازار دا، سەرێ ڕێز و نەوازش ل بەرگیانێ پاک یێن شەهیدان ددانەڤە و ب هەمی ڕێز و وەفاداریڤە ببیرا وان دئینین.
تاوانا جینۆسایدا ئێزدییان و ب سەبیکرنا کچ و ژنێن وان و تێکدانا مال و پەرستگەهێن وان، برینەکە ڤەکری یا دل و دەروونێ گەلێ کوردستانێ یە. مخابن هاووڵاتییێن مە یێن ئێزدی پاشی دوازدە سالان، هێشتا باجێ ناکۆکییێن سیاسی و ئامادەبوونا هێزێن چەکدار یێن نایاسایی ددەن.
ل ڤێرێ جەخت دکەینەڤە کو ئەورکێ حوکوومەتا عێراقی یا فیدرالە ئاسایش و ئاڤەدانی بۆ شەنگالێ ڤەگێڕیت، رێککەوتننامەیا ئاساییکرنا دۆخێ شەنگالێ دگەل حوکوومەتا هەرێما کوردستانێ دا جێبەجێ بکەت، کار بۆ بپارێزگاکرنا وێ بکەت و هێزێن نایاسایی ناوچەی بێلنەڤە؛ تا ئاوارە ڤەدگەڕێنە سەر زێدێ خۆ.
هاووڵاتییێن مە یێن ئێزدی دلنیان دکەینەڤە تا تاقە ڕفێندراوەک بمینیت، تیما نڤیسینگەها مە دێ بەردەوام بیت ل سەر کارێن خۆ بۆ رزگارکرن و ئاشکراکرنا چارەنڤیسێ وان. هەروەسا دێ بەردەوام بین ل سەر هەوڵێن نێڤدەولەتی یێن خۆ تا تاوانێن داعش ل سەر ئاستێ جیهانێ ب تەمامی وەکی جینۆساید دەستۆردار بن و بێنە ناسین.
ل ڤێ یادێ، سوپاس و پێزانینا قووڵا خۆ ئاراستەی خەلکێ مێڤانپەروەر یێ دهۆکێ و بادینان ب گشتی دکەین کو د ساتێن سەخت دا دەرگەهێن مال و قوتابخانە و مزگەوتێن خۆ بۆ ئاوارەیێن ئێزدی ڤەکرن. هەروەسا سوپاس و پێزانین بۆ هەمی ئەو وڵاتێن کو ئەو تاوانە ب جینۆساید ناساندی و ب هەر شێوەیەک بیت، هەوارا ئێزدییان چووینە.
سلاو ل خۆڕاگریا کۆمەلگەها ئێزدی، دروود بۆ گیانێ پاک یێن شەهیدان و تەڤایا ئەو پێشمەرگەیێن قارهمان یێن وێ ڕۆژگارا سەخت ب فەرماندەییا جەنابێ سەرۆک مەسعوود بارزانی، ئەفسانەیا داعش تێکشکاند و گیانێ خۆ بۆ ئازادکرنا شەنگالێ و پاراستنا شکوویێ نیشتمانی بەخشن.