شێخان میدیا
پەیاما سەرۆك بارزانی د ساڵیادا جینۆسایدکرنا ئێزیدییان ل شنگالێ
ب ناڤێ خودایێ مەزن و دلۆڤان
ئەو تاوانا تیرۆرستێن داعشێ دوازدە سال بەریا نوها د دژی خوشك و برایێن مە یێن ئێزیدی ئەنجام دای ئازارەکە بۆ تاهەتایی د یادا كوردستانێ دا دمینە. ئێزیدی ژ بەر كوردبوون و ڕەسەنایەتی و بیروباوەڕێن خۆ یێن ئایینی كەڤتنە بەر شالاڤێن ڕق و ڕەفتارێن نامرۆڤانە یێن تیرۆرستێن داعشێ و هاتنە جینۆسایدکرن. ئەو تاوانا ل سەر دەستێ داعشێ ل دەڤەرا شنگالێ هاتیە ئەنجامدان، درێژەپێدەرا وێ زنجیرە كارەسات و كۆمەڵكوژی و تاوانانە بوو کو ل درێژاهیا مێژوویێ د دژی گەلێ كوردستانێ هاتینە ئەنجامدان.
د سالوەگەرا دوازدێ یا وێ كارەساتێ دا، سلاڤ بۆ گیانێ شەهید و قوربانیێن وێ تاوانێ، سلاڤ بۆ دلێری و چانبێترسیا ئەو پێشمەرگێن قارەمان یێن کو ل سەر چیایێ شنگال ماین و رێكا نەدایە دەستێ تیرۆرستان بگەهیتە چیایێ شنگال، سلاڤ بۆ وەفا و ئازایەتییا هەمی ئەو پێشمەرگێن قارەمان یێن کو بۆ شكاندنا ئابڵووقەیا چیایێ شنگال و ئازادكرنا باژێرێ شنگال خوێنا خۆ بهایی دایی و ئەفسانەیا داعشێ شكاندن. هەروەسا پڕ بە دل سوپاسگوزاریا خۆ ئاڕاستەی هەمی تاكەکەسێن سەربەرز یێن كوردستانێ دكەین، کو وەکو ئێك جەستە هەوسۆز و هەڤخەمێن خوشك و برایێن ئێزیدی بوون، دگەل رێز و سوپاسیا مە بۆ هێزێن هەڤپەیمانان کو رۆلەکێ دیار د هاریکاریا پێشمەرگەی دا گێڕا و تیرۆرست پاشڤە برن و تێکشکاندن.
د یادا وێ كارەساتێ دا بۆ خوشك و برایێن ئێزیدی دووپات دكەم کو ب هەمی توانایەک پشتهڤانێ خواست و داخوازێن وانم. داخوازێ ژی ژ وان دكەم ژ پێخەمەت مسۆگەرکرنا پاشەڕۆژەکا گەش، د ناڤخوە دا ئێكرێز بن و هیڤیێن وان ب پاشەڕۆژێ هەبن. بێگومان، ئەو دۆخە سەپێنراو و نائاساییە یا ل شنگالێ هەیی، تا سەر نابیت و دڤێت خوشک و برا یێن ئێزیدی یێن مە ب سەربەرزی ڤەگەرنە سەر زێدێ باب و باپیرێن خۆ و قەرەبووا زیان و ئازارێن وان بهێتە كرن.
هزاران سلاڤ ل گیانێ پاک یێن شەهیدێن شنگالێ و هەمی شەهیدێن رێکا ئازادیا كوردستانێ
مسعود بارزانی
3ی ئابا 2026