شێخان میدیا
دەستپێک: لۆتکەیا خەمێ و وژدانا نڤستی
کارەساتا شنگالێ برینەکا ئەبەدی و تاوانەکا مەزنا مێژوویی بوو بەرامبەر گەلێ مە یێ ئێزدی و تەڤایا کوردستانێ.
ل شنگالێ، هەناسا تەمۆزێ ب تووز و خوینێ دەست پێ کر؛ ئەو ڕۆژە نە بتنێ ڕۆژەکا ڕەش بوو د مێژوویێ دا، بەڵکو دەمژمێرەک بوو کو تێدا وژدانا جیهانێ بۆ ماوەیەکێ درێژ نڤست. ل سەر لووتکەیێن چیایێ بێدەنگ، فرمێسکێن دایکان بوونە کانیێن بەردەوام و هاوارا زارۆکان د ناڤبەرا سێبەرا داران دا بوو دەنگەکێ نەپچڕیایی.
بەڵێ، ب هزاران ڕوح هاتنە فڕاندن و ب سەدان خێزان د بن بارێ ئەشکەنجەیێ دا پەرش و بەلاڤ بوون، لێ ڕۆحا شنگالێ نەهاتە ئێخسیرکرن. هەر دلۆپەکا خوینێ کو ل سەر بەردێن چیای هاتبیبە ڕشتن، ژ بۆ ڕەسەناتی، وەفاداری و مانێ بوو.
سەرکردایەتیا هەرێما کوردستانێ د مەیدانا خەباتێ دا
د ڤێ کارەساتێ دا، سەرکردایەتیا هەرێما کوردستانێ ب هەمی شیانێن خۆ ڤە هاتە مەیدانێ بۆ پاراستن و ڕزگارکرنا شنگالێ:
رێزدار جەنابی سەرۆک مەسعود بارزانی ڕێبەرێ نەتەوەیی ب ڕۆحیەتەکا پێشمەرگانە، ڕاستەوخۆ سەرپەرشتیا داستانا ڕزگارکرنا شنگالێ ئینایە دەست؛ پەیمانا ڕزگارکرنا وێ دا و بەرەڤانی ژ کەرامەتا شنگالییان و ئێزدییان کر تا شنگال ب تمامەتی هاتبیە پاقژکرن.
رێزدار نێچیرڤان بارزانی سەرۆکێ هەرێما کوردستانێ
ب دامەزراندنا نڤیسینگەکا تایبەت بۆ ڕزگارکرنا خوشک و براین مە یێن ڕفێنراوێن ئێزدی، بزاڤ و خەباتەکا مەزن کر بۆ ئازادکرنا هەزاران ژن و زارۆکێن ئێزدی، و دەنگێ مەزلومیەتا وان گەهاندە هەمی جیهانێ.
رێزدار مەسرور بارزانی سەرۆکێ حکومەتا هەرێما کوردستانێ بەردەوام د خەباتێ دا بوویە بۆ نیاسینا ڤێ کارەساتێ وەک جینۆساید د ئاستێ نێودەولەتی دا، دگەل پێشکەشکرنا هاریکارییان بۆ ئاوارەیان و بەردەوامیا داخوازا ئاڤەدانکرنەڤەیا شنگالێ دا کو ئاسایش و مافێن دانیشتووانێن وێ ب تمامەتی بهێنە پاراستن،
برینێن کو ژ بۆ ڕەسەناتیێ نە، چو جار نابنە ئەگەڕێ شکەستنێ؛ شنگال ژیانە و ژیان ناهێتە خنکاندن.
داستانا قەهرەمانیا پێشمەرگەی و خۆڕاگریا خەڵکی
ل هەمبەر ڤێ تاریکیا ڕەش، چیایێ شنگالێ بووە مەیدانا داستانەکا کەم وێنە یا خۆڕاگریێ؛ خەڵکێ شنگالێ ب دڵەکێ پڕ ژ باوەر و سەربلندی، سنگێ خۆ کرە قەلا ل هەمبەر زۆرداریێ و ڕەسەناتیا خۆ ب بهایێ مانا خۆ پاراست. د وێ ڕۆژا دژوار دا، پێشمەرگەیێن قارەمان سەنگەرێن خوینێ کربوونە مەهرا وەفاداریێ بۆ ئاخا وڵاتی ب روحەکا مهردانه و ب باوەریهکا پۆڵاین، ب هەڵگرتنا ئاڵای پیرۆزی کوردستانێ، ڕێیا ڕزگاریێ ب خوینا خۆ نەخشاند،
شەهیدبوونا پێشمەرگەیێن قهرهمان و کورێن مەردێن شنگالێ، نە بتنێ قوربانیدانەک بوو، بەڵکو بوو سەرمەشقا شەرەف و نیشتمانپەروەریێ. هەر دڵۆپەکا خوینا شەهیدان کو ل سەر سخرێن شنگالێ چاندیی، بوو نیشانا نەمریێ و داستانی؛ وان سەلماند کو مەرگ د ڕێیا کەرامەتێ دا گەلەک شیرینترە ژ ژیانا بن دەستەکیێ. قەهرەمانیا وان مێژوویەکا پڕ ژ شکۆ نفیسی، و خوینا وان تا هەتا دێ وەک ستێرەکا گەش د ئاسمانێ سەربلندیا کوردستانێ دا شەوق دەت.
شنگال نیشانا مان و ڕەسەناتیێیە؛ تاریکی چەندە درێژ بیت، ڕووناهیا دادپەروەریێ دێ هەر زال بیت.