نڤێسین: دلگەش باعەدری
رێکخراوا تیرۆرستی یا عێراق و شام یا ب ناڤێ داعش۳ ـی تەباخا سالا ۲۰۱٤ دەڤەرا شنگالێ داگیر کر. هەر کارەکێ دویری مرۆڤایەتیێ دەرهەقێ ئێزدیێن شنگالێ ئەنجام دا. ب هزاران کەچ و دایک و زارۆک هاتنە رەڤاندن. سەدان زلام و کالەمێر کوشتن، خەلکێ شنگالێ ئاوارە و دەربەردەر بوون. چیایێ پیرۆز یێ شنگالێ جارەکا دی ب خەم و کۆڤان ڤە، بەلگێن دارێن خوە وەشاندن، دگەرمە گەرما هاڤینێ دە ئێزدی دناڤ هەمبێزا خۆدا پاراستن. ب سەدان خەلکێ سڤیل ژ تێهنا و برسادا مرن.
لبەر هەر دارەکا چیایێ شنگالێ گۆرەک هاتە کۆلان، لبەر گەلی و زنارەکا چیایێ شنگالێ داستانەک هاتە تۆمارکرن، دناڤ هەر مالەکێ دا چیرۆکەکا ب ئازار دروست بوو، جهێ زاست و زانینێ بوونە گرتیگەهـ و بازارێن کرین فرۆشتنا کەچ و دایکان. مرۆڤایەتی جیهانێ نەما و مر، شەڤا شنگالێ نەبوو سبەهـ رۆژ لێ نەهەلات، سعودێ و ئیقبال ژ شنگالێ چوون.
دەڤەرا بادینان جارەکا دن ئەرکێ خۆ یێ نشتیمانی و نەتەوی بجهـ ئینا دەرگەهێ مال و مزکەفت و قوتابخانان هەمبەر ئێزدیێن شنگالێ ڤەکر هەر جۆرە هاریکاریەک هەبوو پێشکێشی ئێزدیان کر. ئێزدیێن شنگالێ دناڤ 17 کەمپێن سنورێ پارێزگەها دهۆکێ دا ئاکنجی بوون.
دگەل دەربازبوونا دوازدە سالان ب سەر جینۆسایدا ئێزییان دا دەرباز بوون هێشتا جینوساید یا بەردەوامە. هزاران خێزان دناڤ کەمپان وکاڤلان دا ژیانێ دکەن. نەشیاینە ب زڤرنەڤە بۆ مالێن خۆ.