وەزارەتا نەفتا عیراقێ هەمی ئەو دەنگۆ و ڕاپۆرتێن ڕۆژنامەڤانی ڕەت کرن یێن کو بەحسێ هنارتنا نەفتا عیراقێ ب ڕێکا هێلا شەمەندەفەرێ د ناڤ خاكا ئیرانێ ڕا بۆ وەڵاتێ تورکیا دکر.
وەزارەتا نەفتا عیراقێ د ڕاگەهاندنەکێ دا ڕاگەهاند: پرۆسەیا هنارتنا نەفتا عیراقێ ل دویڤ ڕێکار و سیاسەتێن پەسەندکری یێن وەزارەتێ و کۆمپانیا بەبازاڕکرنا نەفتا عیراقێ (سۆمۆ) دهێتە ئەنجامدان، ئەو ژی تەنێ ژ وان دەرگەهـ و جهانە یێن کو بەری نوکە ب فەرمی هاتینە ڕاگەهاندن.
ل دویڤ وان بانگەشەیێن ئاژانسا فارسی یا ئیرانی ل 19ی ئابێ بەلاڤکرین، گۆتایا ئێکەم بارێ بەرهەمێن نەفتێ یێن عیراقێ ب کوژمێ 50 هزار تۆنان، وەک ترانزێت ب ڕێکا هێلا ئاسنی یا باژێرێ کرماشانێ د ناڤ خاكا ئیرانێ ڕا بەرەڤ تورکیا و ئەفغانستانێ هاتیە هنارتن.
وەزارەتا نەفتێ داخوازێ ژ دەزگەهێن ڕاگەهاندنێ دکەت کو د دەمێ بەلاڤکرنا نووچەیان دا هویر بن و زانیاریان تەنێ ژ ژێدەرێن فەرمی وەربگرن، دا کو دویر بن ژ بەلاڤکرنا زانیاریێن نەراست دەربارەی دۆسیەیەکا هەستیار وەک نەوتێ.