ئەگەر ئادار مەها کوردان بیت، تەباخ مەها کۆڤان و برینانە مەهدی حەسەن موراد

شێخان میدیا

ئەگەر بێژین بەهار مەها کوردانە، ئەڤە راستیە، بەلێ تەباخ نە کێمترە ژ بەهارێ. تەباخ دیرۆکەکا ب خوین و ڕۆناهی هاتیە نڤێسین. مەها ژدایکبوون و شەهادەتێ یە، مەها گری و پێکەنینێ یە، مەها خیانەت و وەفاداریێ یە.
ڕۆژژمێرا تەباخێ – مەها بیرەوەریێن مەزن:
٣١ی تەممووزا ١٩٨٣ بۆ ١ی تەباخێ – ئەنفالا ٨٠٠٠ بارزانیان: ل شەڤا ٣١ی تەممووزێ لسەر ١ی تەباخێ، ڕژێما بەعس ٨٠٠٠ پیاو و گەنجێ بارزانی کۆمکرن و بەرەڤ بیابانێن باشوورێ عێراقێ برن و ژناڤبرن. ژ وێ شەڤێ وەرە ئەو برین بۆ مە بوویە دەستپێکا تەباخەکا خویناوی.
٢ی تەباخێ – جەژنا چلێ هاڤینێ: جەژنەکا پیرۆزا ئایینێ ڕەسەنێ کوردان، ئێزدیاتیێ یە. ل لالش و هەمی کوردستانێ دهێتە گێڕان و هێمایێ بەرەکەت و خێر و بەردەوامیا ئێزدیاتیێ یە.
٣ی تەباخا ٢٠١٤ – فەرمانا شنگالێ، فەرمانا ٧٤ێ: ڕەشترین ڕۆژا دیرۆکا مرۆڤایەتیێ دا. تیرۆرستێن داعشێ هێرش کرنە سەر شنگالێ، هزاران کچ و ژن و زارۆکێن ئێزدی کرنە کەنیزەک و هزاران پیاو و گەنج شەهیدکرن. ئەڤ فەرمانە بەردەوامیا هەمان سیاسەتا ئەنفالێ بوو.
٨ی تەباخا ١٩٨٨ – دوماهیک هاتنا شەڕێ ٨ سالان یێ عێراق و ئێرانێ: ل ڕێککەفتی ٨/٨/١٩٨٨ ئاگربەست هاتە ڕاگەهاندن. ئەو شەڕێ کو ب خوینا کوردان خۆش بووبوو، ژ هەلەبجە و ئەنفالان هەتا سەردەشت و شاران.
١٠ی تەباخا ١٩٢٠ – پەیمانناما سێڤەرێ: ل پاریس هاتە واژۆکرن. د ماددەیێن ٦٢، ٦٣ و ٦٤ دا بۆ ئێکەم جار د یاسایا نێڤدەولەتی دا مافێ دامەزراندنا دەولەتەکێ بۆ کوردان هاتبوو دیارکرن. ئەگەرچی نەهاتە بجەئینان، بەلێ بوویە بەلگەنامەیا یاسایی یا هەرە مەزن کو کورد هەتا ئەڤرۆ پشتی پێ دگرن.
١٢ی تەباخێ – ڕۆژا جیهانی یا لاوان: ڕۆژا هیڤی و پاشەڕۆژێ یە. بۆ مە گرنگە ژبەر کو لاو هەر دەم بزاڤ و داینەمۆیا شۆڕەش و پێشمەرگایەتیێ بوونە.
١٤ی تەباخا ٢٠٠٧ – کارەساتا گرعزێر و سیبا شێخدرێ: ل ڤێ ڕۆژێ تیرۆرستێن ئەلقاعیدە ب ٤ ترۆمبێلێن بۆمبڕێژکری هێرش کرنە سەر کۆمەلگەهێن ئێزدیان ل قەحطانیە و جەزیرە. نێزیکی ٨٠٠ شەهید و بریندار ل دویڤ خۆ هێلا و وەک مەزنترین تیرۆرا دیرۆکا عێراقێ یا پشتی ٢٠٠٣ێ هاتە تۆمارکرن.
١٥ی تەباخا ٢٠١٤ – کۆمکوژیا کوجۆ: ل ڤێ ڕۆژێ داعشێ گوندێ کوجۆ یا شنگالێ گەمارۆدا و نێزیکی ٤٠٠ پیاو و گەنجێ ئێزدی شەهیدکرن و ژن و کچێن وێ برنە کەنیزەک.
١٦ی تەباخا ١٩٤٦ – ڕۆژا ژدایکبوونا دوو هیڤییان، ٨٠ سال خەبات: ئەڤە بلندترین ڕۆژا دیرۆکا نوو یا کوردانە. ل وێ ڕۆژێ ل مەهابادا پایتەختێ کۆمارا کوردستانێ، دوو ژدایکبوون ڕوویدان:
ئـ- ژدایکبوونا ڕێبەر و مەرجەعێ گەلێ کورد سەرۆک مەسعود بارزانی.
بـ- دامەزراندنا پارتی دیموکراتی کوردستان ل سەر دەستێ بارزانیێ نەمر ل بەغدا. ئەو پارتیا کو ژ مللەتی هاتە دروستکرن و بوویە قەلغان و هیڤیا مللەتێ و ئەڤە ٨٠ سالە، ١٩٤٦ بۆ ٢٠٢٦، بێ وچان خەباتێ دکەت.
١٨ی تەباخا ١٩٦٩ – سوتاندنا ئەشکەفتا دەکان: ل سنوورێ شێخان، سوپایێ عێراقێ و جاشێن هەرکی گوندێ دەکان سوتن و ٦٦ ژن و زارۆکێن گوندی یێن ل ناڤ ئەشکەفتا دەکانێ خۆ حەشاردابوون، ب گوللە و ئاگر شەهیدکرن.
١٨ لسەر ١٩ی تەباخا ١٩٧٩ – شەهیدبوونا قارەمان مەحمودێ ئێزدی: ل شەڤا ١٨ لسەر ١٩ی تەباخێ ل بەرێ گارەی، فەرماندێ قارەمان و پێشمەرگێ دێرینێ پارتی، شەهید مەحمودێ ئێزدی ب دەستەکێ خیانەتکار هاتە شەهیدکرن. خوینا وی بوویە سیمبۆلا وەفاداریا ئێزدیخانێ بۆ ڕێبازا پارتی و بارزانی.
٢٥ی تەباخا ١٩٨٨ – ئەنفالا بەهدینان: قۆناغا هەشتێ و دوماهیک قۆناغا ئەنفالان دەستپێکر، کو ناڤ لێ کرن ئەنفالا بەهدینان. ئەو قۆناغە ژ ٢٥ی تەباخێ هەتا ٦ی ئەیلوولێ یا ١٩٨٨ێ بەردەوام بوو و دەهزاران گوندێن دهۆک و ئامێدیێ و باتوفا و زاخۆ هاتنە کاویلکرن.
دوماهیکا گوتارێ:
ئەرێ، تەباخ مەها کۆنتراستایە. د تەباخێ دا داعش و بەعس ویستیان گەلێ مە ژناڤ ببەن، و د هەمان تەباخێ دا پارتی و بارزانی ژدایک بوون دا ببنە قەلغانێ مللەتی.
ژبەر وێ ئیرۆکە ئەم دبێژین: هەر کەسێ بڤێت بزانیت کورد کی یە، با دیرۆکا تەباخێ بخوینیت. دێ تێبگەهیت کا چەند خۆڕاگر و چەند بریندارین، بەلێ هەر دەمێ ژی سەرێ مە بلندە.
سلاڤ بۆ گیانێ پاکێ شەهیدێن تەباخێ و تەمەن درێژی و سەرکەفتن بۆ ڕێبەرێ تەباخێ سەرۆک بارزانی و پیرۆز بیت ٨٠ سالیا خەباتا پارتی دیموکراتی کوردستان.