ژ نڤیسینا (مەسعود حەسەن)
روژ بۆ روژێ مۆدێلێن نوی یێن ژیرییا دەستکرد وەکى (ChatGPT, Manus, Gemini) و گەلەکێن دی دکەڤنە بەر دەستێ مە. بێگومان ئەڤ زێدەبوونە د بەرژەوەندییا مە دایە ژبەر ڤان خالان:
١- پێشبرکێ و داهێنان: هەبوونا چەندین مۆدێلێن ژیرییا دەستکرد، کۆمپانییان هانددت کو بزاڤا باشترکرنا بەرهەمێن خوە بكن.ئەڤ پێشبرکێیە دبتە ئەگەرێ پێشکەفتنەکا بلەز د تەکنۆلۆژیایێ دا، کێمکرنا خەرجییان، و زێدەکرنا هەلبژاردەیان بۆ بکارئینەران.
٢- تایبەتمەندی و باشترکرنا کاران: هەر مۆدێلەك د بوارەکێ دا یێ بهێزە. ئێك بۆ نڤێسینێ، ئێك بۆ وێنەیان، و ئێك ژی بۆ شیکارکرنا داتایان. بکارئینانا چەندین مۆدێلان رێكێ ددت کو باشترین ئامراز بۆ کارەکێ دیارکری بهێتە هەلبژارتن.
٣- کێمکرنا ئالیگریێ (Bias): هەمی مۆدێلێن ژیرییا دەستکرد ل سەر بنەمایێ داتایێن کو پێ هاتینە راهێنانکرن کار دکن، و ئەڤ داتایە دشێن ئالیگریێن جڤاکی بخوەڤە بگرن. بکارئینانا چەندین مۆدێلان ژ ژێدەرێن جودا دشێت هاریکار بت بۆ کێمکرنا ڤێ ئالیگریێ و بدەستڤەئینانا ئەنجامێن هەڤسەنگتر.
٤- زێدەکرنا دروستی و پشتڕاستیێ: بۆ کارێن گرنگ، بەراوردکرنا بەرسڤێن چەندین مۆدێلان دشێت باوەریێ ل دۆر دروستییا پێزانینان زێدە بکت. ئەگەر چەندین مۆدێل ل سەر هەمان ئەنجامی هەڤڕا بن، ئەگەرەکێ زۆر هەیە کو ئەو ئەنجامە دروست بت.
ب کورتی:
هەبوونا گەلەک مۆدێلان وەکى بازاڕەکێ ئازادە، کو د ئەنجام دا بەرژەوەندییا بکارئینەری تێدا پترە. لێ دڤێت ئەم هشیاری ئالنگاریێن وێ ژی بین و ب ژیرانە سەرەدەریێ دگەلدا بکین! نە هەر مۆدێلەکێ نوی هات، دەستا ژ یێ کەڤن بەردین..